قاراعاندىدا قۇقىق قورعاۋ ورگاندارى وكىلدەرىنىڭ قاتىسۋىمەن بولعان وقيعاعا قاتىستى تۇسىنىكتەمە بەرىلدى

قاراعاندى. قازاقپارات - قاراعاندى وبلىستىق پ د مەن پروكۋراتۋراسىنىڭ باسپا ءسوز قىزمەتتەرى قاراعاندى كريمينالدىق پوليتسيا باسقارماسى باستىعىنىڭ ورىنباسارى مەن پروكۋروردىڭ قاتىسۋىمەن بولعان جانجالعا قاتىستى تۇسىنىكتەمە بەردى، دەپ حابارلايدى قازاقپارات ءتىلشىسى.

الەۋمەتتىك جەلىلەردە ەر ادامدار اراسىنداعى قاقتىعىستىڭ ۆيدەوسى تاراپ جاتىر.

كادردا كريمينالدىق پوليتسيا باستىعىنىڭ ورىنباسارى ەرمەك توبىلبايەۆتى بايقاۋعا بولادى. ول جانجالداسىپ جاتقان ازاماتتاردان شەتكەرى تۇرىپ، قاقتىعىستى باقىلاپ تۇر.

بۇل ۋاقىتتا جانجالداسۋشى تاراپتار ءبىر-بىرىنە قول كوتەرىپ، توبەلەسە جونەلەدى. ءدال وسى ساتتە بەينەجازبا توقتايدى.

پوليتسيا دەپارتامەنتى بۇل ۆيدەودا قىلمىستىق پوليتسيا باستىعىنىڭ ورىنباسارى بولعانىن جوققا شىعارمادى.

«الەۋمەتتىك جەلىلەردە ەرلەر اراسىنداعى جانجالدىڭ ۆيدەوسى جاريالاندى، وعان وبلىستىق پ د كريمينالدىق پوليتسيا باسقارماسى باستىعىنىڭ ورىنباسارى قاتىسادى. 4 - شىلدە كۇنى قىلمىستىق پوليتسيا باسقارماسىنىڭ باقىلاۋىنداعى الاياقتىق فاكتىسى بويىنشا قىلمىستىق ءىس فيگۋرانتىنان ق پ ب باستىعى ورىنباسارىنىڭ ۇيالى تەلەفونىنا داۋلى مۇلىككە بايلانىستى جانجال پايدا بولعانى تۋرالى قوڭىراۋ كەلىپ تۇسكەنىن حابارلايمىز. زاڭسىز ارەكەتتەردى بولدىرماۋ جانە ءمان-جايلاردى انىقتاۋ ماقساتىندا ول وقيعا ورنىنا بارىپ، سول جەردە پاترۋلدىك پوليتسيا پولكىنىڭ ناريادىن شاقىردى»، - دەپ حابارلادى قاراعاندى وبلىسى پ د باسپا ءسوز قىزمەتى.

بەلگىلى بولعانداي، تاراپتار اراسىنداعى جانجالعا اۆتوكولىك سەبەپ بولعان. وقيعا ورنىنا پوليتسيانىڭ قوسىمشا كۇشى شاقىرىلدى. ناتيجەسىندە قاقتىعىستىڭ بارلىق قاتىسۋشىلارى قاراعاندى قالاسىنىڭ پوليتسيا بولىمىنە جەتكىزىلدى.

اتالعان فاكتىگە قاتىستى ق ر ق ك 293-بابى «بۇزاقىلىق» بويىنشا سوتقا دەيىنگى تەرگەۋ باستالدى.

ايتا كەتۋ كەرەك، الەۋمەتتىك جەلىلەردە بۇل بەينەدە پروكۋراتۋرا قىزمەتكەرى الەكسەي بونداريەۆ تە بولعانى ايتىلادى.

الايدا، قاراعاندى وبلىسى پروكۋراتۋراسىنىڭ باسپا ءسوز قىزمەتى الەكسەي بونداريەۆ وتكەن جىلدان بەرى پروكۋراتۋرا قىزمەتكەرى ەمەس ەكەنىن حابارلادى.

«جەلىدە قۇقىق قورعاۋ ورگاندارى قىزمەتكەرلەرىنىڭ قاتىسۋىمەن جانجال تۋىندادى دەگەن بەينە تاراتىلدى. قاراعاندى وبلىسىنىڭ پروكۋراتۋراسى ا. ە. بونداريەۆتىڭ 2021-جىلعى 30 - جەلتوقساننان باستاپ پروكۋراتۋرا ورگاندارىنىڭ قىزمەتكەرى بولىپ تابىلمايتىنىن حابارلايدى»، - دەگەن پروكۋراتۋرانىڭ فەيسبۋكتەگى رەسمي پاراقشاسىنداعى جاريالانىمدا.