ەندى اۋىل تۇرعىندارى مەملەكەتتىك قىزمەت الۋ ءۇشىن اۋدان-قالاعا ساندالمايدى
ەندىگى ۋاقىتتا اۋىلدان شىقپاي- اق مەملەكەتتىك قىزمەتتى الۋ مۇمكىندىگى تۋادى.
بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى سيفرلىق ترانسفورماتسيالاۋ دەپارتامەنتىنىڭ ديرەكتورى نازگۇل باجايەۆا ءمالىم ەتتى، دەپ حابارلايدى قازاقپارات ءتىلشىسى.
«مەملەكەتتىك قىزمەتتەردىڭ قولجەتىمدىلىگىن ارتتىرۋ جانە مەملەكەتتىك ورگاندارمەن ءوزارا ءىس-قيمىل جاساۋ ماقساتىندا «قازپوشتا» ۇلتتىق وپەراتورىنىڭ بازاسىندا سيفرلىق بۇرىش پايدا بولادى. سيفرلىق بۇرىش قىزمەتىن پوشتا جۇمىسشىسى ۇسىنادى. ول جەر ينتەرنەت، كومپيۋتەر جانە باسقا دا قاجەتتى تەحنيكامەن جابدىقتالعان. بۇگىندە اۋىل تۇرعىندارى مەملەكەتتىك قىزمەتتى الۋ ءۇشىن «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ بولىمشەسى بار اۋدان ورتالىعىنا نەمەسە قالاعا بارادى. ول ۋاقىت پەن اقشانى تالاپ ەتەدى»، - دەدى نازگۇل باجايەۆا «AMANAT» پارتياسى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، سيفرلىق بۇرىشتار قازپوشتانىڭ اۋىلداعى 2 مىڭ بولىمشەسىندە اشىلادى. سونداي-اق، اتالعان جاڭاشىلدىق بۇگىندە ش ق و- دا پيلوتتىق رەجيمدە ىسكە اسىپ جاتىر.
ودان بولەك، مينيسترلىك وكىلى 2025-جىلدىڭ سوڭىنا دەيىن ەلىمىزدە كەمىندە 20 مىڭ IT مامانىن دايارلاۋ جوسپارى تۇرعانىن تىلگە تيەك ەتتى.
بۇعان دەيىن قازاقستاندىقتار ەندى بارلىق جەردە جەكە كۋالىكتىڭ ەلەكتروندى نۇسقاسىن قولدانا الاتىنىن حابارلاعان ەدىك.
سونداي-اق، قازاقستاندىقتارعا ۇيدەگى ينتەرنەت وپەراتورىن تاڭداۋ مۇمكىندىگى بەرىلمەك. ودان بولەك، EgovMobile ارقىلى الۋعا بولاتىن قۇجاتتار سانى كوبەيگەنى ايتىلدى.
