قازاقستاندا سيفرلىق كودەكس قابىلدانۋى مۇمكىن

نۇر-سۇلتان. قازاقپارات - قازاقستاندا سيفرلاندىرۋ جانە اقپاراتتىق قاۋىپسىزدىك سالاسىنداعى زاڭنامانى ودان ءارى جەتىلدىرۋ جوسپارلانىپ وتىر، دەپ حابارلايدى قازاقپارات ءتىلشىسى.

«زاڭنامانى قايتا قاراۋدىڭ كەلەسى كەزەڭى ءبىرشاما قيىنعا سوعادى. بۇل جەردە بارلىق سالالىق مەملەكەتتىك ورگاندار قاتىسۋى قاجەت. ولار ءوز ۇستانىمىن قايتا قاراۋى ءتيىس. بۇكىل پروتسەستەردى بىردەي ءتۇسىنىپ، شەشىم قابىلدايتىن امبەباپ مامان جوق. ارينە، رەينجينيرينگپەن اينالىساتىن تەحنيكتەر جالپى بيزنەس- پروتسەستى تۇسىنەدى، ءبىراق جۇمىس ءادىسناماسى سالا ماماندارىنا عانا ايان»، - دەدى ق ر پارلامەنتى ءماجىلىسىنىڭ دەپۋتاتى ەكاتەرينا سمىشليايەۆا «AMANAT» پارتياسى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، ءاربىر مەملەكەتتىك ورگان كورسەتەتىن قىزمەتتىڭ موبيلدى، اشىق جانە قولجەتىمدىلىگىنە تالداۋ جۇرگىزىلەدى.

«دەپۋتاتتىق كورپۋستىڭ مىندەتى - ناتيجەلى شەشىمدەردى قولداۋ جانە زاڭ سورەدە جاتپاي، ادامداردىڭ يگىلىگىنە جاراۋىن قامتاماسىز ەتۋ. سيفرلاندىرۋ جونىندەگى زاڭ شىعارۋ پروتسەسى قازىر قىزۋ قارقىنمەن ءجۇرىپ جاتىر. ءبىر زاڭ قابىلدانسا، از ۋاقىتتان سوڭ قايتا وزگەرىس ەنگىزۋ كەرەك بولادى. وسىلايشا بىزگە 1-2 جىلدان كەيىن سيفرلىق كودەكستىڭ قاجەتتىگى كورىنىپ تۇر. كودەكس ءبىز ازىرلەپ جاتقان بۇكىل نورمالارىمىزدى ءبىرىڭعاي جۇيەگە جيناقتايدى جانە ورتاق قۇقىقتىق الاڭدا جۇمىس ىستەيتىن بولادى»، - دەيدى ول.

ايتا كەتسەك، 15- شىلدە كۇنى مەملەكەت باسشىسى سيفرلاندىرۋ، اقپاراتتىق قاۋىپسىزدىكتى دامىتۋ ماسەلەلەرى بويىنشا وزگەرىس ەنگىزۋ تۋرالى زاڭعا قول قويدى. بۇعان دەيىن حابارلاعانىمىزداي، جاڭا زاڭ اياسىندا قازاقستاندىقتار ەندى بارلىق جەردە جەكە كۋالىكتىڭ ەلەكتروندى نۇسقاسىن قولدانا الادى.

سونداي-اق، مينيسترلىك وكىلى قازاقستاندىقتارعا ۇيدەگى ينتەرنەت وپەراتورىن تاڭداۋ مۇمكىندىگى بەرىلەتىنىن ايتتى.

ودان بولەك، EgovMobile ارقىلى الۋعا بولاتىن قۇجاتتار سانىنىڭ كوبەيگەنىن حابارلاعان ەدىك.