استانادا حالىقتىڭ تابىسىن ارتتىرۋ باعدارلاماسى قالاي جۇزەگە اسىپ جاتىر

نۇر-سۇلتان. قازاقپارات - بۇگىن قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ ەلوردادا ورنالاسقان الەۋمەتتىك نىسانداردىڭ جۇمىسىمەن تانىستى.

جۇمىس ساپارىنا ورتالىق جانە جەرگىلىكتى مەملەكەتتىك ورگانداردىڭ وكىلدەرى مەن الەۋمەتتىك كاسىپكەرلەر قاتىستى، دەپ حابارلايدى قازاقپارات.

ۆيتسە-پرەمەر «مەيىرىم» كوپسالالى مەديتسينا ورتالىعىندا بولىپ، ونىڭ قىزمەتىمەن، مۇمكىندىكتەرى جانە ونداعى جاڭاشىلدىقتارمەن تانىستى.

سونىڭ ءبىرى - ەلىمىزدىڭ بارلىق وڭىرلەرىن بەينەكونفەرەنتسيا بايلانىسى ارقىلى قوساتىن تەلەمەديتسينا كابينەتى. اتالعان جوبانىڭ ارقاسىندا شالعاي ەلدى مەكەندەردىڭ تۇرعىندارى ساپالى مەديتسينالىق كومەك، كەڭەس الا الادى، ال دارىگەرلەر تاجىريبە الماسىپ، كونسيليۋم وتكىزەدى.

ە. توعجانوۆ ەلىمىزدىڭ ءاربىر ازاماتىنا مەديتسينالىق قىزمەتتەردىڭ قولجەتىمدىلىگىن قامتاماسىز ەتۋدىڭ ماڭىزىن اتاپ ءوتتى.

ودان كەيىن ۆيتسە-پرەمەر كاسىپكەرلىك نىسان «تاۋەلسىز ءومىر دوس» ورتالىعىندا بولدى.

مۇندا مۇمكىندىگى شەكتەۋلى جانداردىڭ بەلسەندى دەربەس ومىرگە ورالۋىنا جانە ازاماتتىق قوعامعا كىرىگۋىنە كومەك كورسەتىلەدى. ورتالىقتا 28 ادام قىزمەت ەتەدى، ونىڭ ىشىندە مۇمكىندىگى شەكتەۋلى 17 ادام بار. اتالعان نىساننىڭ وكىلدەرى «وڭالتۋ تەحنيكاسىن ساتۋ بويىنشا شوۋ-رۋمدى»، تەحنيكانى، مۇكاممالدى جانە باسقا جوندەۋ جۇرگىزىلەتىن «ينۆا-ستو» سەرۆيس ورتالىعىن تانىستىردى.

پرەمەر-ءمينيستردىڭ ورىنباسارى ءوز سوزىندە مۇمكىندىگى شەكتەۋلى ادامداردىڭ كوپ كەزدەسەتىن قيىندىقتارى تۋرالى ايتىپ، قىزمەتكەرلەرگە باسا نازار اۋدارۋدى قاجەت ەتەتىن باعىتتاردى اتاپ ءوتتى. سونداي-اق، ورتالىقتاعى پروبلەمالىق ماسەلەلەردى سۇراپ، ەلوردا اكىمدىگىنە مەملەكەتتىك ورگاندارمەن بىرلەسىپ، ولاردى قىسقا مەرزىمدە شەشۋدى تاپسىردى.

«مەملەكەت باسشىسىنىڭ تاپسىرماسى بويىنشا ۇكىمەت حالىقتىڭ تابىسىن ارتتىرۋ باعدارلاماسىن جۇزەگە اسىرىپ جاتىر. مۇنداعى نەگىزگى ماقسات - ەكونوميكانى يندۋستريالاندىرۋ جانە ارتاراپتاندىرۋمەن، كاسىپكەرلىكتى دامىتۋمەن ۇشتاسقان حالىقتىڭ تابىسىن ارتتىرۋ جانە ناتيجەلى جۇمىسپەن قامتاماسىز ەتۋ. باعدارلامادا كوزدەلگەن شارالار حالىقتىڭ الەۋمەتتىك وسال توپتارى مەن تابىسى تومەن ازاماتتاردىڭ پايداسىنا بيۋدجەت قاراجاتىن ءادىل بولۋگە، ولاردىڭ ەكونوميكاعا ودان ءارى ينتەگراتسيالانۋىن ىنتالاندىرۋعا باعىتتالعان. بۇل - جاڭا مۇمكىندىكتەر باعدارلاماسى، اسىرەسە كومەككە مۇقتاج ادامدار ءۇشىن. ونىڭ مىندەتى - تەك قاراجات ءبولۋ عانا ەمەس، الۋشىلاردى جۇمىسپەن قامتۋدىڭ ءارتۇرلى نىساندارىنا تارتۋ ارقىلى وزدەرىنىڭ الەۋمەتتىك مارتەبەسىن وزگەرتۋگە، ماتەريالدىق جاعدايىن جاقسارتۋعا ىنتالاندىرۋ. باعدارلامانىڭ وسىنداي باعىتتارىنىڭ ءبىرى - الەۋمەتتىك كاسىپكەرلىك»، - دەپ اتاپ ءوتتى ە. توعجانوۆ.

ۆيتسە-پرەمەر بارعان كەلەسى نىسان الەۋمەتتىك وسال ساناتتارعا جاتاتىن ادامداردى وقىتۋعا جانە جۇمىسقا ورنالاستىرۋعا باعىتتالعان جوبا بولىپ تابىلاتىن «Green TAL» الەۋمەتتىك كاسىپورنى بولدى. جوباعا 62 ادام تارتىلدى، ونىڭ 53 ءى الەۋمەتتىك وسال ساناتتارعا جاتادى.

ۆيتسە-پرەمەر كاسىپورىننىڭ قىزمەتىمەن، ونىڭ وندىرىسىمەن جانە قۋاتىمەن تانىستى.

ە. توعجانوۆ ۇكىمەت تاراپىنان باسا كوڭىل بولىنەتىنىن، جان-جاقتى قولداۋ كورسەتىلەتىنىن جانە الەۋمەتتىك كاسىپكەرلەرگە ءوز ءىسىنىڭ باسەكەگە قابىلەتتىلىگى مەن رەنتابەلدىلىگىن قامتاماسىز ەتۋ قاجەتتىگىن اتاپ ءوتتى.

ۆيتسە-پرەمەردىڭ ايتۋىنشا، مۇنداي جوبالار تابىسى جوعارى تولىققاندى بيزنەسكە اينالۋى ءتيىس.

سونداي-اق، ۆيتسە-پرەمەر ءتيىستى مەملەكەتتىك ورگاندارعا الەۋمەتتىك كاسىپكەرلىكتى دامىتۋعا بايلانىستى پروبلەمالىق ماسەلەلەردى جەكە وتىرىستا قاراۋدى تاپسىردى.