قازاقستاندا كوروناۆيرۋسقا قارسى قانداي ۆاكسينالار بار

نۇر-سۇلتان. قازاقپارات – ق ر دەنساۋلىق ساقتاۋ مينيسترلىگى ينفەكتسيالىق اۋرۋلاردى ەپيدەمولوگيالىق باقىلاۋ باسقارماسىنىڭ باسشىسى روزا قوجاپوۆا كوروناۆيرۋسقا قارسى قانداي ۆاكسينالار قولجەتىمدى ەكەنىن ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا رەسپۋبليكا بويىنشا ۆاكسينالاۋ جانە ريەۆاكسينالاۋ جۇمىسى جالعاسىپ جاتىر. قازاقستاندا ۆاكسينانىڭ ءۇش ءتۇرى قولجەتىمدى، ولار - QazVac, Sinopharm جانە Pfizer. ريەۆاكسينالاۋ ءۇشىن - QazVac جانە Sinopharm بار»، - دەدى ر. قوجاپوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سپيكەردىڭ ايتۋىنشا، ەكپە ەگۋ پۋنكتىلەرىندە 1 ميلليون 600 مىڭ ۆاكسينا دوزاسى بار.

«بۇگىنگى تاڭدا كوروناۆيرۋس ينفەكسياسىنا قارسى ۆاكسينامەن ەرەسەك تۇرعىنداردىڭ %80 دان استامى نەمەسە بارلىق حالىقتىڭ %56 دان استامى قامتىلعان. رەسپۋبليكا بويىنشا كوروناۆيرۋس ينفەكسياسىنا قارسى باستاپقى ريەۆاكسينالاۋمەن قامتۋ ءتيىستى حالىقتىڭ %68 دان استامىن (4,9 ميلليون ادام) قۇرادى. ورتا ەسەپپەن تاۋلىگىنە 10 مىڭنان استام ادام ەكپە سالدىرادى»، - دەدى روزا قوجاپوۆا.

باسقارما باسشىسى مامىر ايىنىڭ سوڭىنان باستاپ ەلدە ريەۆاكسينالاۋ ەنگىزىلگەنىن ەسكە سالدى.

بۇگىندە ءتيىستى حالىقتىڭ %55 ريەۆاكسينا جاساتقان.

ايتا كەتەيىك، كوروناۆيرۋس بويىنشا جەدەل جاردەمدى ەڭ كوپ شاقىرۋ قاراعاندى وبلىسىندا جانە نۇر-سۇلتان، الماتى قالالارىندا تىركەلگەن.