قازاقستاندىقتارعا ۇيدەگى ينتەرنەت وپەراتورىن تاڭداۋعا مۇمكىندىك بەرىلەدى
الداعى ۋاقىتتا تۇرعىنداردىڭ موبيلدى وپەراتوردى تاڭداۋ مۇمكىندىگى بولادى.
بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تەلەكوممۋنيكاتسيا كوميتەتى ءتوراعاسىنىڭ ورىنباسارى گۇلنارا بوكەيەۆا ءمالىم ەتتى، دەپ حابارلايدى قازاقپارات ءتىلشىسى.
«تۇرعىن ءۇي كەشەنىن سالعان كەزدە ونىڭ يەسىمەن قانداي موبيلدى وپەراتور بولاتىنى تۋرالى كەلىسىم جاسالادى. ياعني تۇرعىندار ءۇشىن 1 موبيلدى وپەراتور تاڭدالادى. بۇل جەردە تۇرعىن ءۇي سالعان جاۋاپتى كومپانيامەن قاتار، تۇرعىنداردىڭ دا پىكىرى ەسكەرىلەدى. قازىرگى ۋاقىتتا جاڭا زاڭ جوباسى قارالىپ جاتىر. وعان سايكەس تۇرعىندارعا موبيلدى وپەراتوردى تاڭداۋ مۇمكىندىگى قاراستىرىلىپ، ينتەرنەتكە قول جەتكىزۋدە تەڭ مۇمكىندىك بەرىلمەك»، - دەدى «AMANAT» پارتياسى الاڭىندا وتكەن باسپا ءسوز ءماسليحاتىندا.
ءماجىلىس دەپۋتاتى ەكاتەرينا سمىشليايەۆانىڭ ايتۋىنشا، اتالعان زاڭ جوباسى بايلانىس نارىعىن مونوپولياسىزداندىرۋعا باعىتتالعان.
«زاڭدا تۇرعىن ءۇي نەمەسە عيمارات سالعان كەزدە بايلانىسپەن قامتاماسىز ەتۋ مىندەتى قاتار قويىلادى. بۇگىندە ءبىزدىڭ نارىقتا تەك نەگىزىنەن ءىرى ءموبيلدى وپەراتورلار جۇمىس ىستەپ جاتىر. شاعىن وپەراتورلاردىڭ قاتىسا الماۋى ءبىرقاتار قۇقىقتىق شەكتەۋلەر بار. سونىمەن قاتار ءبىزدىڭ ەلىمىزدە شاعىن موبيلدى وپەراتورلار جوقتىڭ قاسى. ايتالىق، ولار شالعاي اۋىلدارعا بارمايدى. ويتكەنى ابونەنتتەردىڭ سانى وتە از، كوممەرتسيالىق تۇرعىدان ءتيىمسىز. ال ءبىزدىڭ قويىپ وتىرعان مىندەت - نارىق باسەكەسىنە توتەپ بەرەتىن، ساپا ءۇشىن كۇرەسەتىن جانە شالعاي ەلدى مەكەندەردى بايلانىسپەن قامتاماسىز ەتەتىن شاعىن بايلانىس وپەراتورلارىنىڭ كوپتەپ پايدا بولۋى»، - دەپ تولىقتىردى دەپۋتات.
بۇعان دەيىن حابارلاعانىمىزداي ەندىگى ۋاقىتتا قازاقستاندىقتار جەكە كۋالىكتىڭ ەلەكتروندىق نۇسقاسىن قولدانا الادى.
