نۇر-سۇلتاندا قاجەت كەزدە كولىكتىڭ ءنومىرىن جاسىراتىن قۇرىلعى ورناتىپ العان جۇرگىزۋشى ۇستالدى

نۇر-سۇلتان. قازاقپارات - نۇر-سۇلتاندا پوليتسيا قىزمەتكەرلەرى كولىگىنە قاجەت كەزدە ءنومىردى جاسىراتىن قۇرىلعى ورناتىپ العان جۇرگىزۋشىنى ۇستادى، دەپ حابارلايدى قازاقپارات.

استانا قالالىق پوليتسيا دەپارتامەنتىڭ باسپا ءسوز قىزمەتىنىڭ حابارلاۋىنشا، ءتارتىپ ساقشىلارى جولداعى كەزەكشىلىك بارىسىندا جالعان نومىرمەن جۇرگەن ەكى جۇرگىزۋشىنى ۇستادى.

ولار قابانباي باتىر داڭعىلىنىڭ بويىندا اۋەجاي جاعىنان اينالما جولمەن كەلە جاتقان «تويوتا مارك 2» ماركالى اۆتوكولىكتى توقتاتقان. تەكسەرۋ كەزىندە جۇرگىزۋشىنىڭ كولىكتە قاجەت بولعان جاعدايدا مەملەكەتتىك ءنومىردى جاسىرا الاتىن قۇرىلعىنى پايدالانعانى انىقتالدى.

مەملەكەتتىك تىركەۋ ءنومىرى بەلگىلەرىن سايكەستەندىرۋگە كەدەرگى كەلتىرەتىن ارنايى قۇرىلعىلاردى پايدالانىپ، كولىك قۇرالىن باسقارعانى ءۇشىن ق ر ا ق ب ت ك-نىڭ 590-بابى 4-بولىگى بويىنشا اكىمشىلىك حاتتامالار تولتىرىلدى.

«سوت شەشىمىمەن جۇرگىزۋشىلەرگە 20 ا ە ك كولەمىندە ايىپپۇل سالىنادى نەمەسە ءبىر جىل مەرزىمگە كولىك قۇرالدارىن باسقارۋ قۇقىعىنان ايىرۋ جازاسى قاراستىرىلعان. ءتارتىپ بۇزۋشىلاردىڭ اۆتوكولىكتەرى كوممۋنالدىق اۆتوتۇراققا قويىلدى»، - دەلىنگەن باسپا ءسوز حابارلاماسىندا.

باسپا ءسوز قىزمەتىنىڭ مالىمەتتەرىنە قاراعاندا، ءتارتىپ ساقشىلارى جەدەل الدىن الۋ ءىس- شاراسى بارىسىندا جولاۋشىلاردى زاڭسىز تاسىمالداۋدىڭ 8 فاكتىسىن انىقتاعان. سونداي-اق زاڭسىز تاسىمالداۋمەن اينالىسقان وزبەكستان جانە تاجىكستان رەسپۋبليكاسىنىڭ ازاماتتارىن ۇستادى. جۇرگىزۋشىلەر جولاۋشىلاردى «Yandex» موبيلدى قوسىمشاسى ارقىلى ءتيىستى تىركەۋ قۇجاتتارىنسىز تاسىمالداعان.

شەتەلدىكتەرگە قاتىستى ق ر ا ق ب ت ك-نىڭ 436-بابى بويىنشا اكىمشىلىك حاتتامالار تولتىرىلىپ، اۆتوكولىكتەر كوممۋنالدىق تۇراققا ورنالاستىرىلدى.

ايتا كەتەيىك، ەلوردادا 19-شىلدەدەن باستاپ جول قاۋىپسىزدىگىن قامتاماسىز ەتۋ ماقساتىندا «قاۋىپسىز جول» جەدەل- الدىن الۋ ءىس-شاراسى ءوتىپ جاتىر. ونىڭ بارىسىندا مىڭنان استام جول قوزعالىسى ەرەجەسىن بۇزۋ فاكتىسى انىقتالدى، ونىڭ ىشىندە 9 جۇرگىزۋشى قارسى قوزعالىس جولاعىنا شىققانى ءۇشىن، 2 جۇرگىزۋشى ماس كۇيىندە كولىك باسقارعانى ءۇشىن ۇستالدى.

جاياۋ جۇرگىنشىلەر وتكەلىنەن ادامداردى وتكىزبەگەنى ءۇشىن 21 جۇرگىزۋشى، اپاتتى جاعداي تۋدىرعانى ءۇشىن 9 جۇرگىزۋشى جانە 32 جۇرگىزۋشى باعدارشامنىڭ تىيىم سالاتىن سيگنالىنا وتكەنى ءۇشىن جاۋاپقا تارتىلدى.

سونىمەن قاتار «قورعاۋ» موبيلدى قوسىمشاسىنىڭ كومەگىمەن 146-عا جۋىق جۇرگىزۋشى اكىمشىلىك قۇقىق بۇزۋشىلىق بويىنشا بەرەشەكتەرى بار ەكەنى تۋرالى حابارلاندى. نۇر- سۇلتان قالاسىنىڭ كوممۋنالدىق تۇراعىنا 33 اۆتوكولىك ورنالاستىرىلدى.