جۇمىسسىزدىق. جوعارى جالاقى قاي سالادا؟

نۇر-سۇلتان. قازاقپارات – جاستار اراسىنداعى جۇمىسسىزدىقتىڭ باسىم بولىگى الماتىدا.

رەسمي دەرەككە سايكەس الماتىدا 14 مىڭنان اسا جاس مامان ەڭبەك نارىعىندا ءوز ورنىن تاپپاعان، دەپ حابارلايدى «حابار 24».

رەسپۋبليكا بويىنشا ءاربىر بەسىنشى جۇمىسسىز ادام الماتىدا تۇرادى. وعان نەگىز دە جوق ەمەس. ەلىمىزدەگى جوعارى وقۋ ورىندارىنىڭ 30 پروتسەنتى وڭتۇستىك استانادا ورنالاسقاندىقتان، وقۋىن بىتىرگەن جاس مامانداردىڭ كوپشىلىگى ەلىنە قايتپاي، الماتىدا قالىپ قويادى.

سەبەبى مۇندا قىزمەت كورسەتۋ سالاسىندا ەڭبەك ەتۋگە مۇمكىندىك بار.

«IT ماماندىعىن بىتىرگەن سوڭ تەحنيكا ساتاتىن دۇكەندە جۇمىس ىستەدىم. سونداي-اق كولل ورتالىقتا دا ەڭبەك ەتتىم. دوستارىمنىڭ كوبى وسىنداي جۇمىستاردى ىستەدى. جەتكىزۋ قىزمەتىندە جۇرگەندەر دە بار. قازىر نەگىزىنەن ونلاين جۇمىستاردى ءجون كورەدى كوبى. ينستاگرامنان، تيك-توكتان كوپ پايدا تابۋعا بولادى»، دەيدى IT مامانى دامير دايىربەك.

رەسمي تۇردە جۇمىسسىز سانالعانىمەن، ولاردىڭ تابىسى جامان ەمەس. كەڭسەدە وتىرعان كەيبىر ازاماتتاردان كوپ تابادى ەكەن. كوپشىلىگى از ۋاقىتتا اياققا تۇرىپ، جاعدايلارىن جاقسارتىپ الۋدى قالايدى. جاستار اراسىنداعى بۇل ءۇردىستى جۇمىس بەرۋشىلەر مەن جۇمىس ىزدەۋشىلەردىڭ اراسىن بايلانىستىراتىن رەكرۋتينگتىك اگەنتتىك وكىلدەرى دە جوققا شىعارمايدى.

«بۇل جاھاندىق ترەند، جاستار قازىر ونى جاقسى تۇسىنەدى. تابان اۋدارماي ءبىر جەردە 10 -جىل قىزمەت ەتسەڭ، ءبولىم باسشىسى بولاسىڭ دەگەن تۇسىنىك ەسكىرگەن. جاستار جالاقى قايدا كوپ، سول جاققا قاراي مويىن بۇرۋدا. ول جەردە قابىلەتىڭ بولسا جەتكىلىكتى، تەز توسەلىپ، تابىسقا جەتۋىڭ وڭاي. ءارى دامىپ، وسۋگە دە، قوسىمشا ءبىلىمدى جەتىلدىرۋگە دە مۇمكىندىك مول»، دەيدى رەكرۋتينگتىك اگەنتتىكتىڭ مەنەدجەرى راحيما ماحمۋدوۆا.

دەگەنمەن ەڭبەك نارىعىندا ديپلومدى ماماندارعا سۇرانىس جوعارى. وسى جىلدىڭ ەكىنشى جارتىسىندا جۇمىس بەرۋشىلەر تاراپىنان تۇسكەن ۇسىنىس 16 پروتسەنتكە وسكەن. اسىرەسە IT سالاسىنىڭ ماماندارى اۋاداي قاجەت. ەڭ باستىسى، جاستاردىڭ ءوز بىلىكتىلىگىن كورسەتىپ، باستاپقى تاجىريبە جيناۋىنا مۇمكىندىك بەرۋ كەرەك. بۇل باعىتتا الماتىدا 6 جۇمىسپەن قامتۋ باعدارلاماسى جۇزەگە اسىرىلۋدا. اسىرەسە وقىماعان، ديپلومى جوق جۇمىسسىز ازاماتتارعا باسىمدىق بەرىلمەك.

«ءبىز ازاماتتاردىڭ بۇل توبىن جۇمىسپەن قامتۋ ءۇشىن ارنايى مەحانيزم ازىرلەپ جاتىرمىز. ماسەلەن، الماتى قالاسى اكىمدىگىندە ءتۇرلى باعىتتاعى مەملەكەتتىك تاپسىرىستى ورىندايتىن ءبولىم بار. اكىمدىكتىڭ تاپسىرىسى بويىنشا جولداردىڭ، عيماراتتاردىڭ جانە باسقا دا نىسانداردىڭ قۇرىلىس جۇمىستارىندا قانشا جۇمىس ورىندارىنىڭ اشىلىپ جاتقانىن انىقتاپ، وسى جوبالارعا الماتى قالاسىنىڭ جۇمىسسىز جاستارىنىڭ قاتىسۋىن قامتاماسىز ەتپەكپىز. بۇعان دەيىن مەردىگەر كومپانيا جۇمىس كۇشى رەتىندە باسقا ايماقتاردان ازاماتتاردى الىپ كەلەتىن»، دەيدى قالالىق جاستار ساياساتى باسقارماسىنىڭ باسشىسى قايىرجان مەڭدىعاليەۆ.

ساراپشىلاردىڭ پىكىرىنشە، بۇگىندە ەڭبەك نارىعىندا ۆەب- ديزاينەر، IT، جالپى گەيم- يندۋستريانىڭ ماماندارى ەرەكشە سۇرانىسقا يە. جاستار كوزدەگەن مول تابىس تا وسى سالادا.