پۋتيننىڭ باسپا ءسوز حاتشىسى رەسەي پرەزيدەنتىنىڭ دەنساۋلىعى تۋرالى ايتتى

نۇر-سۇلتان. قازاقپارات - رەسەي پرەزيدەنتىنىڭ باسپا ءسوز حاتشىسى دميتري پەسكوۆ ۆلاديمير پۋتيننىڭ دەنساۋلىعىنا قاتىستى اقپاراتقا پىكىر ءبىلدىردى، - دەپ حابارلايدى ر ي ا نوۆوستي.

«ونىڭ دەنساۋلىعى جاقسى. امەريكالىق جانە ۇلى بريتانيالىق، سونداي-اق، ۋكراينالىق اقپارات «ساراپشىلارى» كەيىنگى ايلاردا پرەزيدەنتتىڭ دەنساۋلىعى تۋرالى ءتۇرلى «وسەك-اياڭ» تاراتىپ جاتقانىن بىلەسىزدەر. بۇل «وسەك-اياڭنان» باسقا ەشتەڭە ەمەس. ءبىز بۇل تۋرالى ايتىپ ءجۇرمىز»، - دەدى پەسكوۆ.

بۇل رەتتە ا ق ش- تىڭ ورتالىق بارلاۋ باسقارماسىنىڭ باسشىسى ۋيليام بەرنس رەسەي باسشىسىنىڭ دەنساۋلىق جاعدايىن «ساپ-ساۋ» دەپ باعالادى.

«پرەزيدەنت پۋتيننىڭ دەنساۋلىعىنا قاتىستى كوپتەگەن قاۋەسەت بار. ءبىراق ءبىزدىڭ بىلۋىمىزشە، ول ساپ-ساۋ. بۇل - بارلاۋ قىزمەتىنىڭ بەيرەسمي باعالاۋى»، - دەپ كەلتىرەدى اگەنتتىك بەرنستىڭ اسپەن فورۋمىندا سويلەگەن ءسوزىن.

19- شىلدەدە ۆلاديمير پۋتين جۇمىس ساپارىمەن يران استاناسى تەگەرانعا باردى. باتىس اقپارات قۇرالدارى رەسەي پرەزيدەنتى جۋرناليستەردىڭ سۇراعىنا جاۋاپ بەرۋ كەزىندە ءجيى جوتەلگەنىنە نازار اۋدارعان.

كەيىنىرەك ۆلاديمير پۋتين تەگەرانداعى اپتاپ پەن جەلدەتكىشكە شاعىمدانعان. پرەزيدەنتتىڭ باسپا ءسوز حاتشىسى دا يرانعا ساپارى كەزىندە جەلدەتكىش استىندا داۋىسى قارلىعىپ قالعانىن ايتتى.

«جەلدەتكىشكە كەلەتىن بولساق، ءيا، شىنىندا دا، ىستىق، كوشەدە 40 گرادۋس، جەلدەتكىش استىندا سالقىن، داۋىسىم قارلىعىپ، مەندە دە سولاي بولدى. دەلەگاتسياداعى باسقالاردى بىلمەيمىن، ءبىراق مۇنداي بولادى، ءبارى جاقسى»، - دەدى دميتري پەسكوۆ.

massaget.kz