پرەمەر-مينيستر وتستاۆكاعا كەتۋگە ءوتىنىش بەردى

نۇر-سۇلتان. قازاقپارات - يتاليانىڭ پرەمەر-ءمينيسترى ماريو دراگي بەيسەنبى كۇنى ەل پرەزيدەنتى سەردجو ماتتارەللاعا وتستاۆكاعا كەتۋ تۋرالى جاڭا ءوتىنىش بەردى.

تاڭەرتەڭ پارلامەنتتىڭ تومەنگى پالاتاسىندا ءسوز سويلەگەن ول وتىرىستى توقتاتۋدى سۇراپ، مەملەكەت باسشىسىنا باراتىنىن ايتتى، دەپ حابارلايدى قازاقپارات Euronews اگەنتتىگىنە سىلتەمە جاساپ.

«مەن وتىرىستى توقتاتۋدى سۇرايمىن. سەبەبى ءوز نيەتىمدى (وتستاۆكاعا كەتەتىنىمدى - رەد) حابارلاۋ ءۇشىن رەسپۋبليكا پرەزيدەنتىنە بارماقپىن»، - دەدى دراگي.

پرەزيدەنت بۇل ءوتىنىشتى نازارعا الىپ، ۇكىمەتكە اعىمداعى مىندەتتەردى ورىنداۋدى تاپسىردى.

ءبىر كۇن بۇرىن سەنات پرەمەر-مينيسترگە ەڭ از داۋىسپەن سەنىم بىلدىرگەن ەدى. داۋىس بەرۋگە قاتىسۋدان بىردەن ءۇش پارتيا - «5 جۇلدىزدى» قوزعالىس»، «العا، يتاليا» جانە بيلەۋشى كواليتسياعا كىرەتىن «ليگا» باس تارتىپ، وعان سەناتورلاردىڭ جارتىسىنان ازى قاتىستى.

وتكەن اپتادا دراگي وتستاۆكاعا كەتۋگە ءوتىنىش بەرگەن ەدى، ءبىراق ونى پرەزيدەنت قابىلدامادى.

ويتكەنى رەسمي تۇردە ۇكىمەت پارلامەنتتىك كوپشىلىكتىڭ قولداۋىن جوعالتپاعان ەدى. بيلەۋشى پارتيالاردىڭ ءبىرى - «5 جۇلدىزدى» قوزعالىس ينفلياتسيا ءۇشىن ازاماتتارعا وتەماقى تولەۋ تۋرالى زاڭ جوباسى بويىنشا داۋىس بەرۋدەن باس تارتۋى، ونىڭ ەرەجەلەرى پارتيا وكىلدەرىنە سايكەس كەلمەۋى بيلىكتىڭ قازىرگى داعدارىسىنا اكەلدى.