الداعى ءۇش جىلدا قازاقستان ىشكى نارىقتى قۇس ەتىمەن تولىقتاي قامتاماسىز ەتەدى
بۇل تۋرالى Ⅸحالىقارالىق قۇس وسىرۋشىلەر فورۋمىندا ق ر اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆ ايتتى، دەپ حابارلايدى قازاقپارات ءتىلشىسى.
«2025-جىلعا قاراي قۇس ەتى بويىنشا يمپورتتى تولىقتاي وتاندىق ونىممەن الماستىرۋ جوسپارلانعان. بۇل تۇرعىدا جاڭا قۇس فابريكالارى سالىنىپ، قازىر قولدانىستا تۇرعاندارى جاڭعىرتۋدان وتەدى»، - دەدى ا. ساپاروۆ.
ونىڭ ايتۋىنشا، 2021-جىلدىڭ قورىتىندىسى بويىنشا 8 قۇس فابريكاسى پايدالانۋعا بەرىلگەن.
جوبالاردىڭ جالپى قۇنى 40 ميلليارد تەڭگەنى قۇرادى.
ال جاڭادان قۇرىلعان جۇمىس ورىندارى 500 گە جۋىقتاعان.
ءوز كەزەگىندە قازاقستان قۇس وسىرۋشىلەرى وداعىنىڭ پرەزيدەنتى رۋسلان ءشارىپوۆ ەلىمىزدىڭ بىرنەشە وڭىرىندە فابريكالار سالىنىپ جاتقانىن ايتتى.
«مەنىڭ ويىمشا، الداعى ەكى-ءۇش جىلدا قۇس ەتىمەن ىشكى نارىقتى تولىقتاي قامتاماسىز ەتەمىز. سونىمەن قاتار، ۇيرەك پەن قاز وسىرەتىن شارۋاشىلىقتار دا ەلىمىزدە بىرتىندەپ دامىپ كەلە جاتىر»، - دەدى ر. ءشارىپوۆ.
بيىل قازاقستاندا قۇس ءوسىرۋ سالاسىندا وڭ كورسەتكىشتەر بايقالىپ وتىر. بۇعان دەيىن حابارلانعانداي، قۇس جەمىنىڭ قىمباتتاۋىنا بايلانىستى قۇس وسىرۋشىلەر قيىندىققا تاپ بولعان.
«قۇس جەمىنىڭ ءبىر تونناسى 180-190 مىڭ تەڭگەگە جەتتى. قۇس ەتى مەن جۇمىرتقانىڭ وزىندىك قۇنىنىڭ 70 پايىزى جەمنىڭ باعاسىنا قاتىستى بولادى. ەگەر قۇس جەمى ارزان بولسا، وندا ءبىزدىڭ ءونىم دە نارىققا تومەن باعامەن شىعادى»، - دەدى ر. ءشارىپوۆ.
قازاقستاننىڭ قۇس وسىرۋشىلەرى وسى سالاعا مەملەكەتتىك قولداۋ جاساۋدى سۇراپ وتىر.
