قازاقستان ورتالىق ازيا ەلدەرىمەن شەكارانى شەگەندەۋ تاجىريبەسىمەن بولىسۋگە دايىن - توقايەۆ

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ ورتالىق ازيا ەلدەرىنە شەكارانى شەگەندەۋدىڭ تاسىلدەرىن ازىرلەيتىن ساراپشىلىق الاڭ قۇرۋدى ۇسىندى، دەپ حابارلايدى قازاقپارات ءتىلشىسى.

«ەكىنشى. ءبىز، مەملەكەت كوشباسشىلارى وڭىردە ءالى دە بولسا ساقتالىپ وتىرعان تۇراقسىزدىڭ فاكتورلارىن بارىنشا جويۋ ءۇشىن مۇمكىندىگىنشە كۇش سالۋىمىز كەرەك. مەملەكەتتەر اراسىنداعى شەكارادان شىققان ءاربىر وقتىڭ داۋىسى قاتىسى بار ەلدەردە عانا ەمەس بۇكىل وڭىردە جاڭعىرىق تۋعىزۋدا. ءدال بۇگىنگى داعدارىس جاعدايىندا مەملەكەتتەرىمىز كەرىسىنشە قايشىلىقتاردى ەڭسەرۋدىڭ وركەنيەتتى، جاۋاپتى ۇلگىسىن تانىتا ءبىلۋى كەرەك. شەكارا راسىمدەۋدىڭ زاڭدىق پروتسەسى سونشالىق كۇردەلى ءارى كەدىر- بۇدىرلى ەكەنىن ءبىز ءوز تاجىريبەمىزدەن بىلەمىز. داۋلى ماسەلەلەردى تاتۋ كورشىلىك پەن حالىقارالىق قۇقىقتىڭ ىرگەلى پريتسپتەرىنە قۇرمەتپەن قاراۋ ارقىلى عانا بەيبىت جولمەن شەشۋگە بولادى. ودان باسقا بالاما جولى جوق»، - دەدى قاسىم- جومارت توقايەۆ ورتالىق ازيا مەملەكەتتەرى باسشىلارىنىڭ IV كونسۋلتاتيۆتىك كەزدەسۋىندە.

مەملەكەت باسشىسىنىڭ پايىمىنشا، پروبلەمالاردى سوزباققا سالۋ مەن جىلى جاۋىپ قويۋ شيەلەنىسكە باستاۋى مۇمكىن.

«ءتۇپتىڭ تۇبىندە بۇل ورتالىق ازياداعى ارىپتەستىكتى دامىتۋعا جۇمسالعان بۇكىل ەڭبەكتى ەش ەتۋى مۇمكىن. قازاقستان پوستكەڭەستىك كەڭىستىكتەگى شەكاراسىن تولىق دەليميتاتسيالاعان جالعىز مەملەكەت رەتىندە مۇنداي ماسەلەلەردىڭ ءوزارا قولايلى شەشىمىن ىزدەۋ جولىندا جاردەم كورسەتۋگە دايىن. ناقتى ايتساق، شەكارالاردى دەليميتاتسيالاۋ ماسەلەسىندە ءوزارا قولايلى تاسىلدەردى ازىرلەيتىن ساراپشىلىق الاڭ قۇرۋدى ۇسىنامىز. بۇل جۇمىسقا تاجىريبەلى زاڭگەرلەر، كارتوگرافتار، شەكاراشىلار مەن وزگە دە ماماندار تارتىلۋى كەرەك. ونى ۇيلەستىرۋدى سىرتقى ىستەر مينيسترلەرىنىڭ كەڭەسى ءوز موينىنا الا الادى»، - دەدى پرەزيدەنت.

قازاقستان مەن ورتالىق ازيا ەلدەرىنىڭ تاۋار اينالىمىن 15 ميلليارد دوللارعا جەتكىزۋ قاجەت. بۇل تۋرالى ق ر پرەزيدەنتى قاسىم- جومارت توقايەۆ ايتتى.

«كوپجاقتى ءوزارا ءىس- ارەكەتتىڭ مىعىم ەكونوميكالىق بازاسىن قالىپتاستىرۋ وزەكتى مىندەت بولىپ قالا بەرەدى. سوڭعى جىلدارى بۇل باعىتتا ايتارلىقتاي ناتيجەگە قول جەتكىزىلدى. سوڭعى 5 جىلدىڭ ىشىندە قازاقستاننىڭ ورتالىق ازياداعى وزگە ەلدەرمەن تاۋار اينالىمى 42 پايىزعا ارتىپ، 6,3 ميلليارد دوللارعا جەتتى. ءوزارا ساۋدا- ساتتىقتى ۇلعايتا ءتۇسۋ ءۇشىن مول رەزەرۆتىڭ بار ەكەنىن ەسكەرە وتىرىپ، كوز جەتەرلىك كەلەشەكتە بۇل كورسەتكىشتى مۇمكىندىگىنشە 15 ميلليارد دوللارعا دەيىن جەتكىزۋ قاجەت»، - دەدى قازاقستان پرەزيدەنتى ورتالىق ازيا مەملەكەتتەرى باسشىلارىنىڭ IV كونسۋلتاتيۆتىك كەزدەسۋىندە.