يزرايل ءمينيسترى يزرايلدىك جۋرناليستىڭ مەككەدە تۇسىرگەن رەپورتاجىن اقىماقتىققا تەڭەدى
دۇيسەنبى كۇنى يزرايلدىڭ Chanel 13 تەلەارناسى ساۋد ارابياسىنىڭ مەككە قالاسىندا تۇسىرىلگەن الەمدىك جاڭالىقتار رەداكتورى گيل تاماريدىڭ تەلەرەپورتاجىن كورسەتتى. جۋرناليست مۇسىلمان ءدىنىن ۇستانبايتىن ادامداردىڭ يسلام ءدىنىنىڭ قاسيەتتى ورنىنا بارۋىنا تىيىم سالىنعانىنا قاراماستان، مۇسىلماندار ءۇشىن قاسيەتتى قالاعا جاسىرىن بارعان. ون مينۋتتىق بەينەرەپورتاجدا يزرايلدىك رەپورتەر جەرگىلىكتى گيدكە ۇقسايتىن اداممەن بىرگە جۇرەدى. تاماري يۆريت تىلىندە رەپورتاج ءتۇسىرىپ، داۋىسىن باسەڭدەتەدى، كەيدە باسقالارعا ءوزىنىڭ يزرايلدىك ەكەنىن بىلدىرتپەس ءۇشىن اعىلشىن تىلىنە اۋىسادى. جۋرناليست ارافات تاۋىنا كوتەرىلگەن ءساتىن دە ءتۇسىرىپ العان. بۇل وقيعا تاياۋ شىعىس ەلدەرىندە حالىقتىڭ نارازىلىعى مەن وتكىر سىنىنا ۇشىرادى. جاريالانعاننان كەيىنگى كۇنى تاماري مۇسىلمانداردان كەشىرىم سۇرادى.
«قايتالاپ ايتقىم كەلەدى، بۇل مەككەگە ساپار مۇسىلمانداردى نەمەسە باسقا ادامداردى رەنجىتۋ ءۇشىن جاسالماعان. ۆيدەو بىرەۋدى رەنجىتكەن بولسا، كەشىرىم سۇرايمىن. بۇل شارانىڭ ماقساتى مەككەنىڭ ماڭىزدىلىعىن جانە ءدىننىڭ كوركەمدىگىن كورسەتۋ، سول ارقىلى ءدىني توزىمدىلىك پەن ينكليۋزيۆتىلىكتى ارتتىرۋ بولدى»، - دەپ جازدى جۋرناليست تۆيتتەردە.
سارسەنبى كۇنى يزرايلدىڭ ايماقتىق ىنتىماقتاستىق ءمينيسترى يساۆي فرەي رەپورتاجعا «اقىماقتىق ءارى زياندى» دەگەن باعا بەردى. «مەنىڭ ويىمشا، بۇل اقىماقتىق بولدى... مۇلدەم ورىنسىز جانە جاي عانا رەيتينگ ءۇشىن جاسالعان دۇنيە»، - دەدى فرەي، يزرايل تاريحىنداعى ەكىنشى مۇسىلمان ءمينيسترى.
ونىڭ پىكىرىنشە، بۇل جاعداي ساۋد ارابياسى مەن يزرايل اراسىنداعى قارىم- قاتىناستى قالىپقا كەلتىرۋ مۇمكىندىگىنە نۇقسان كەلتىرەدى.
اۆتور: سماعۇلوۆا ەركەجان
