قاراقالپاقستاندا توتەنشە جاعداي رەجيمى مەرزىمىنەن بۇرىن توقتاتىلدى

تاشكەنت. قازاقپارات - وزبەكستان پرەزيدەنتى شاۆكات ميرزيەۆ قاراقالپاقستان اۋماعىنداعى توتەنشە جاعداي رەجيمىن مەرزىمىنەن بۇرىن توقتاتۋ تۋرالى جارلىققا قول قويدى.

قازاقپاراتتىڭ مەنشىكتى ءتىلشىسى بۇل تۋرالى اتالعان ەل باسشىسىنىڭ باسپا ءسوز قىزمەتىنە سىلتەمە جاساپ حابارلايدى.

مۇنداي شەشىم قاراقالپاقستان جوعارعى كەڭەسىنىڭ 20- شىلدەدە ەل پرەزيدەنتىنە جولداعان وتىنىشىنەن كەيىن قابىلداندى. جوعارعى كەڭەس ەلدە قوعامدىق ءتارتىپ قالپىنا كەلگەنىن، ازاماتتاردىڭ قاۋىپسىزدىگىن قامتاماسىز ەتۋ، ولاردىڭ قۇقىعى مەن بوستاندىعىن قورعاۋ بويىنشا شارالار قابىلدانعانىن اتاپ وتكەن.

«2022 -جىلعى 2- شىلدەدەگى № ۋ پ- 164 «قاراقالپاقستان رەسپۋبليكاسى اۋماعىندا توتەنشە جاعداي رەجيمىن ەنگىزۋ تۋرالى» وزبەكستان رەسپۋبليكاسى پرەزيدەنتىنىڭ جارلىعىمەن ەنگىزىلگەن قاراقالپاقستان رەسپۋبليكاسى اۋماعىنداعى توتەنشە جاعداي رەجيمى 2022 -جىلدىڭ 21 -شىلدەسى ساعات 05.00 مينۋتتان باستاپ مەرزىمىنەن بۇرىن توقتاتىلسىن»، - دەلىنگەن قۇجاتتا.

شاۆكات ميرزيەۆتىڭ جارلىعىن بەكىتۋ ءۇشىن ولي ءماجىلىس پالاتالارىنا جولداندى. قۇجاتتىڭ ورىندالۋى وزبەكستان پرەمەر- ءمينيسترى ابدۋللا اريپوۆكە جانە پرەزيدەنت جانىنداعى قاۋىپسىزدىك كەڭەسىنىڭ حاتشىسى ۆيكتور ماحمۋدوۆكە جۇكتەلدى.

ەسكە سالايىق، قاراقالپاقستان رەسپۋبليكاسىنىڭ اۋماعىندا ازاماتتار قاۋىپسىزدىگىن قامتاماسىز ەتۋ جانە ءتارتىپتى قالپىنا كەلتىرۋ ماقساتىندا 2022 -جىلدىڭ 3- شىلدەسىنەن 2- تامىزعا دەيىن ەلدە توتەنشە جاعداي ەنگىزىلگەن بولاتىن.

اۆتور: ميرا تولەندى قىزى