جەتىسۋ وبلىسىندا جۇگەرى سىرنەسىنەن قانت ءوندىرۋ ۇسىنىلدى

جاركەنت. قازاقپارات - جەتىسۋ وبلىسىنىڭ پانفيلوۆ اۋدانىنداعى جاركەنت كراحمال-سىرنە زاۋىتى قانتقا دەگەن قاجەتتىلىكتىڭ ءبىر بولىگىن جۇگەرى شارباتىمەن وتەۋدى ۇسىنىپ وتىر، دەپ حابارلايدى قازاقپارات ءتىلشىسى وبلىس اكىمىنىڭ باسپا ءسوز قىزمەتىنە سىلتەمە جاساپ.

ويتكەنى، بۇل داقىلدىڭ قۇرامىندا %75 كە دەيىن قانت بار. سوندىقتان، ءونىمدى وندىرىستىك ماقساتتا، ياعني، تابيعي قانت الماستىرعىش رەتىندە پايدالانۋعا بولادى.

وسى رەتتە جاركەنت كراحمال-سىرنە زاۋىتى ەلىمىزدەگى ءىرى كونديتەرلىك فابريكالار مەن سۋسىن شىعاراتىن زاۋىتتاردى قاجەتتى ونىممەن قامتاماسىز ەتىپ وتىر.

جىلىنا 75 مىڭ توننا جۇگەرى سىرنەسىن دايىندايدى. الداعى ۋاقىتتا قۋاتىن ەكى ەسە ۇلعايتقالى وتىر. وڭىرگە جۇمىس ساپارىمەن بارعان وبلىس اكىمى بەيبىت يسابايەۆ وسى باعىتتاعى جوبا- جوسپارلارمەن تانىستى.

«ماسەلەن، ەلىمىزدە قانت تۇتىنۋ كولەمى 550 مىڭ توننا بولسا، سونىڭ جارتىسى - وندىرىستىك سۇرانىس. بۇل قاجەتتىلىكتىڭ نەگىزگى بولىگىن جاركەنت كراحمال-سىرنە زاۋىتى وتەۋگە قاۋقارلى. ول ءۇشىن جاڭا جەلى اشىپ، كاسىپورىندى كەڭەيتۋ كوزدەلىپ وتىر. قازىر زاۋىت جىلىنا 120 مىڭ توننا جۇگەرىنى 97 پايىزعا دەيىن تەرەڭدەتىپ وڭدەپ، 28 ءتۇرلى ءونىم شىعارۋدا. كاسىپورىندى كەڭەيتۋ اياسىندا 200 مىڭ تونناعا دەيىن جۇگەرى قابىلداۋ جوسپاردا بار»، - دەلىنگەن ۆەدومستۆونىڭ حابارلاماسىندا.

بۇل رەتتە وبلىس اكىمى شارۋالاردى ىنتالاندىرۋ كەرەكتىگىن العا تارتتى. سونىمەن قاتار، ىرگەلەس ورنالاسقان، پوليپروپيلەن قاپ شىعاراتىن «ۋنيۆەرسال» كاسىپورنىندا بولدى.

وندا جىلىنا 50 ميلليون شاماسىندا قاپ شىعارىلادى. زاۋىت بۇگىندە ىركىلىسسىز جۇمىس ىستەپ تۇر.