قازاقستان شاحماتشىلارى ءۇندىستاندا وتەتىن وليمپيادادا ۇزدىك ۇشتىككە ەنۋدى جوسپارلاپ وتىر

الماتى. قازاقپارات - ۋكراينالىق شاحماتشى، گروسسمەيستەر، قازاقستان ايەلدەر قۇراماسىنىڭ جاتتىقتىرۋشىسى الەكساندر مويسەەنكو الداعى بۇكىلالەمدىك شاحمات وليمپياداسىندا كوماندا الدىندا ۇزدىك ۇشتىككە ەنۋ مىندەتى تۇرعانىن ايتتى، دەپ حابارلايدى قازاقپارات ءتىلشىسى.

«ءبىزدىڭ ايەلدەر كومانداسى وتە مىقتى. ءبىز مەدال الىپ، ۇزدىك ۇشتىككە كىرۋ ءۇشىن بار كۇش- جىگەرىمىزدى سالامىز. باسەكەلەستەر دە، قارسىلاستار دا مىقتى. بۇل رەيتينگتىك جارىستىڭ فاۆوريتتەرى - ءۇندىستان قۇراماسى، سونىمەن قاتار ولار ءوز الاڭىندا وينايدى. سونداي-اق ءبىزدىڭ باسەكەلەستەرىمىز - ۋكراينا، گرۋزيا، پولشا، ا ق ش، ازەربايجان»، - دەيدى الەكساندر مويسەەنكو.

ونىڭ ايتۋىنشا، بۇل ەلدەردىڭ ەرلەر قۇراماسى دا مىقتى.

قازاقستان ەرلەر قۇراماسى ءۇشىن ەڭ باستىسى - رەيتينگتى كوتەرۋ، ۇزدىك 20-لىققا ەنۋ.

«بۇل ولار ءۇشىن وتە جاقسى ناتيجە بولادى. بىزدە ازداپ باسقا تاپسىرمالار بار. جىگىتتەر مىقتى، بولاشاعى زور. ءبىز ولارعا سەنەمىز»، - دەيدى باپكەر.

قازاقستان ايەلدەر قۇراماسى ساپىندا جانسايا ابدىمالىك، دينارا ءسادۋاقاسوۆا، ءبيبىسارا اساۋبايەۆا، مەرۋەرت كاماليدەنوۆا جانە گۇلىسحان ناحبايەۆا بار.

ەرلەر قۇراماسىندا رينات جۇمابايەۆ، مۇرتاس قاجعاليەۆ، دەنيس ماحنيەۆ، جاندوس اعمانوۆ جانە ارىستانبەك ۋرازايەۆ ونەر كورسەتەدى.

قازىر سپورتشىلار الماتىدا بىرگە جاتتىعىپ جاتىر. ولار 26- شىلدەگە دەيىن وسىندا بولادى، ودان كەيىن ءۇندىستانعا ۇشادى.

ايتا كەتەيىك، 28- شىلدە مەن 10- تامىز ارالىعىندا ءۇندىستاننىڭ چەنناي قالاسىندا شاحماتشىلاردىڭ 44- وليمپياداسى وتەدى.