ۇلىتاۋ وبلىسىنىڭ اكىمى وڭىردە مال شارۋاشىلىعىن دامىتۋ مۇمكىندىگىن ايتتى

جەزقازعان. قازاقپارات - ۇلىتاۋ وبلىسىندا ەت وڭدەۋگە ارنالعان اۋقىمدى كاسىپورىن سالىنادى. بۇل تۋرالى ايماق اكىمى بەرىك ءابدىعالي ۇلى ايتتى، دەپ حابارلايدى قازاقپارات ءتىلشىسى.

«اۋىل شارۋاشىلىعىن دامىتۋدا كەدەرگى كەلتىرىپ وتىرعان ماسەلە ەت فابريكاسىنىڭ بولماۋىنا قاتىستى بولىپ وتىر. ءبىزدىڭ وڭىردەگى اۋدانداردا مال بارشىلىق. وسى ورايدا مالدىڭ باسىم بولىگىن وڭتۇستىك وڭىرلەرگە اكەتىپ جاتىر. ياعني وسى تاسىمالدانىپ جاتقان مال باسى وڭتۇستىكتە بورداقىلانىپ، ەتكە وتكىزىلەدى. بىزگە وسىنىڭ بارلىعىن وبلىس اۋماعىندا ۇيىمداستىرۋ كەرەك»، - دەدى ب. ءابدىعالي ۇلى وڭىرلىك كوممۋنيكاتسيالار قىزمەتىندە.

ونىڭ ايتۋىنشا، وڭىردە اۋقىمدى ەت كومبيناتى قۇرىلاتىن بولادى. سوندىقتان ينۆەستورمەن كەلىسسوز جۇرگىزىلىپ جاتىر.

«قازىر يندۋستريا ايماعى ايقىندالىپ جاتىر. سول جەرگە ينجەنەرلىك جەلىلەردى تارتىپ قويماقپىز. الداعى جىلى اتالعان نىساننىڭ قۇرىلىسىن باستايمىز دەگەن جوسپار بار. الدىن الا ەسەپتەۋ بويىنشا 7 ميلليارد تەڭگە قاراجات كەرەك بولىپ تۇر. ونىڭ ىشىندە كەم دەگەندە 3 مىڭ باس مالدى بورداقىلاۋ الاڭى بولادى. ەتتى وڭدەۋ، كونسەرۆىلەۋ، شۇجىق ونىمدەرىن شىعارۋ كاسىپورىندارى جاساقتالماق. بۇل ءونىمدى سىرتقا شىعارۋ مۇمكىندىگى دە قاراستىرىلعان»، - دەدى وبلىس اكىمى.

ونىڭ ايتۋىنشا، وڭىردە جىلقىنىڭ، ءىرى قارا مال باسىنىڭ سانى كوبەيىپ كەلەدى. الايدا، قوي سانىنىڭ ازايعانى بايقالىپ وتىر. بۇدان بۇرىن حابارلانعانداي، بەرىك ءابدىعالي ۇلى ۇلىتاۋ وبلىسى بيۋدجەتىنىڭ بەكىتىلۋىنە وراي، وڭىردەگى ماڭىزدى نىسانداردىڭ قۇرىلىسى جۇرگىزىلەتىنىن ايتتى.