ىزدەۋ جاريالانعان تۇركىستاندىق ءتورت جاس ءوسپىرىم پەتروپاۆلدان تابىلدى

پەتروپاۆل. قازاقپارات - تۇركىستان وبلىسىنىڭ ءوز بەتىمەن جۇرگەن ءتورت جاسءوسپىرىمىن پەتروپاۆل پوليسەيلەرى قالادان تاپتى.

ولار ەشكىمدى ەسكەرتپەستەن ۇيلەرىنەن كەتىپ، «ەل ارالاۋعا شىققان» ەكەن، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پوليتسەيلەر تۇركىستان وبلىسىنىڭ 16 جاستاعى تۇرعىنىن پەستروە كولىنىڭ ماڭىنان تاپقان. جاسءوسپىرىمنىڭ جوعالعانى تۋرالى شىمكەنت قالاسىندا تۇراتىن ونىڭ اناسى حابارلاعان. كەيىن بوزبالانىڭ ءوزى سياقتى كامەلەتكە تولماعان ءۇش بالامەن بىرگە ەلدى ارالاۋعا شىققانى بەلگىلى بولدى.

«تورتەۋى دە كامەلەتكە تولماعانداردى بەيىمدەۋ ورتالىعىنا جەتكىزىلدى، اتا- انالارىنا ولاردىڭ جۇرگەن جەرى تۋرالى حابارلاندى. جاسوسپىرىمدەردىڭ تاراپىنان، سونداي- اق ولارعا قاتىستى جاسالاتىن قۇقىق بۇزۋشىلىقتاردى ازايتۋ ءۇشىن پوليتسەيلەر اتا- انالاردى بالالارىنا بارىنشا كوڭىل بولۋگە، ولاردىڭ بوس ۋاقىتتارىندا نەمەن اينالىساتىنىن، كىممەن جۇرەتىنىن قاداعالاۋعا شاقىرادى»، - دەيدى پەتروپاۆل قالاسىنىڭ پ ب جەرگىلىكتى پوليسيا قىزمەتى ءبولىمىنىڭ باستىعى رۋستام سادۋلوۆ.

شىلدەنىڭ 15 ى مەن 19 ى ارالىعىندا پەتروپاۆل قالاسىندا يۋۆەنالدىق پوليتسەيلەرى «قاۋىپسىز جاز» اكسياسىن وتكىزدى. ءتارتىپ ساقشىلارى تۇرمىسى قولايسىز وتباسىلاردى تەكسەرىپ، جازعى لاگەرلەردە پروفيلاكتيكالىق اڭگىمەلەر جۇرگىزدى. سونداي- اق، جاستاردىڭ جۇرەتىن جەرلەرى - كوڭىل كوتەرۋ ورىندارىن، كومپيۋتەرلىك كلۋبتاردى تەكسەردى.

رەيدتەر كەزىندە جاسوسپىرىمدەرگە سۋعا ءتۇسۋ، بەيتانىس ادامدارمەن سويلەسۋ ەرەجەلەرى، الاياقتىق تۋرالى جادىنامالار تاراتىلدى. اكسيا بارىسىندا پەتروپاۆلدىڭ 7 تۇرعىنى بالالارىنىڭ تۇنگى ۋاقىتتا كوشەدە جالعىز جۇرگەنى ءۇشىن جاۋاپقا تارتىلدى.