استانادا كوروناۆيرۋستىڭ تارالۋ قارقىنى تامىزدىڭ ورتاسىندا باسەڭدەۋى مۇمكىن

نۇر-سۇلتان. قازاقپارات - نۇر-سۇلتان قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى سارحات بەيسەنوۆا شىلدەنىڭ اياعى مەن تامىز ايىندا كوروناۆيرۋستىڭ تارالۋ قارقىنى قالاي وزگەرەتىنى تۋرالى بولجامىمەن ءبولىستى، دەپ حابارلايدى قازاقپارات ءتىلشىسى.

«وزدەرىڭىز بىلەسىزدەر، دەنساۋلىق ساقتاۋ مينيسترلىگى اي سايىن الداعى 3 ايعا بولجام جاساپ وتىرادى. سول بولجامداردىڭ دەرەگىنە سۇيەنسەك، سىرقاتتانۋ كورسەتكىشى تامىز ايىنىڭ ورتاسىنا دەيىن جالعاسادى. تامىزدىڭ اياعى مەن قىركۇيەك ايىنىڭ باسىندا قايتا باسەڭدەيدى. نۇر- سۇلتان قالاسى بويىنشا دا وسىنداي بولجامدى ۇستانىپ وتىرمىز. ياعني، شىلدە ايىندا سىرقاتتانۋ قارقىنى جوعارى بولىپ وتىر. تامىز ايىنىڭ ورتاسىنا دەيىن سىرقاتتانۋ قارقىنى تومەندەمەيدى دەپ توپشىلاپ وتىرمىز» ، - دەدى قالانىڭ باس سانيتار دارىگەرى. سارحات بەيسەنوۆانىڭ ايۋىنشا، قالاداعى ەپيدەميولوگيالىق احۋال «سارى» ايماققا جاقىنداپ كەلەدى.

«تاۋلىگىنە جاڭا جاعدايلاردىڭ سانىن تىركەۋ 586 جاعدايعا جەتتى. ەپيدەميولوگيالىق جاعدايدى باعالاۋدىڭ جاڭا ماتريتساسى بويىنشا، ەلوردامىز «سارى» ايماققا جاقىنداپ كەلەدى»، - دەدى ول ونلاين بريفينگىدە.