دەنساۋلىق ساقتاۋ سالاسى جاڭا ەلەكتروندى جۇيەگە كوشەدى - ۆيتسە-مينيستر

نۇر-سۇلتان. قازاقپارات - دەنساۋلىق ساقتاۋ سالاسى eHealth جاڭا ەلەكتروندى جۇيەسىنە كوشەدى. بۇل جوبا سالانى سيفرلاندىرۋ ماقساتىندا جاسالىپ وتىر.

قازاقپارات ءتىلشىسىنىڭ ساۋالىنا جاۋاپ بەرگەن دەنساۋلىق ساقتاۋ ۆيتسە-ءمينيسترى بەيبىت ەسەنبايەۆ وسىلاي دەپ ءمالىم ەتتى.

ونىڭ ايتۋىنشا، پرەزيدەنت سىنىنان كەيىن سالانى سيفرلىق ترانسفورماتسيالاۋ بويىنشا جۇمىستار قايتا قارالىپ، جاڭا پلاتفورماعا كوشۋ جۇمىسى پىسىقتالىپ جاتىر.

«دەنساۋلىق ساقتاۋ سالاسىن سيفرلاندىرۋ اياسىندا eHealth ەلەكتروندى دەنساۋلىق ساقتاۋدىڭ جاڭا ساندىق فورماتىنا كوشۋ جۇمىستارى باستالدى. EHealth ەلەكتروندى دەنساۋلىق ساقتاۋ جۇيەسى ازاماتتاردىڭ دەنساۋلىق پاسپورتىن تولىققاندى جانە جان-جاقتى قالىپتاستىرۋعا ىقپال ەتەدى. بۇل ازاماتتاردىڭ سۇرانىسىنا باعىتتالعان مەديتسينالىق كومەكتىڭ ساپاسى مەن قولجەتىمدىلىگىن ارتتىرۋعا باعىتتالعان. سونداي- اق، eHealth پاتسيەنتتەردىڭ دەنساۋلىق جاعدايىن ۇنەمى باقىلاۋ جانە مەديتسينالىق قىزمەتتەردى جەدەل ۇسىنۋدى جۇزەگە اسىرۋدى قامتاماسىز ەتەدى»، - دەپ ءمالىم ەتتى ۆيتسە-مينيستر قازاقپارات ءتىلشىسىنىڭ ساۋالىنا جاۋاپ بەرە وتىرىپ.

بەيبىت ەسەنبايەۆتىڭ مالىمەتىنشە، eHealth پلاتفورماسىنا كوشۋ كەزىندە قايتالاما فۋنكتسيالاردى اتقاراتىن اقپاراتتىق جۇيەلەر الىنىپ تاستالادى.

«eHealth ساندىق دەنساۋلىق ساقتاۋ جۇيەسىن ىسكە قوسۋ ءۇشىن 2022-2023 -جىلدارعا ارنالعان جوسپار ازىرلەۋ كوزدەلۋدە. وعان سايكەس، دەنساۋلىق ساقتاۋ سالاسىنداعى بارلىق اقپاراتتىق جۇيەلەر ءوزارا ىقپالداسا وتىرىپ جۇمىس ىستەيدى. ونىڭ ىشىندە مەديتسينالىق مەكەمەلەر اراسىندا كلينيكالىق دەرەكتەر الماسۋ جۇيەسىن رەتتەۋ ماڭىزدى»، - دەدى بەيبىت ەسەنبايەۆ.

ەسكە سالا كەتەيىك، مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا دەنساۋلىق ساقتاۋ مينيسترلىگى سالانى سيفرلاندىرۋدان قاشىپ وتىر، دەپ سىن ايتقان ەدى.