تايلاندتا قيىن جاعدايعا تاپ بولعان تۋريستەرگە كومەكتەسەتىن ءادىس ويلاپ تابىلدى

نۇر-سۇلتان. قازاقپارات - تايلاندتىڭ تۋريزم باسقارماسى (ت ا ت) تۋريستەر ءۇشىن ارنايى قوسىمشا ويلاپ تاپتى، ونىڭ كومەگىمەن پوليتسياعا جىلدام حابارلاسۋعا بولادى. بۇل تۋرالى ا ت و ر حابارلادى.

Tourist Police I Lert U قوسىمشاسىنىڭ ارقاسىندا قۇقىق قورعاۋ ورگاندارى قىزمەتكەرلەرى وقىس وقيعالاردى دەرەۋ تەكسەرەتىن بولادى.

وسىلايشا، قيىن جاعدايعا تاپ بولعان تۋريستەر وزدەرىنە ىڭعايلى ادىسپەن كومەك سۇراي الادى: بار بولعانى ولار سۋرەتكە تۇسىرەدى نەمەسە چاتقا جازادى - مەكەن-جايى اۆتوماتتى تۇردە انىقتالىپ، كوورديناتتارى ورتالىققا بىردەن تۇسەدى.

قوسىمشانى جۇكتەۋ تەگىن جانە Android پەن iOS پلاتفورمالارىندا قولجەتىمدى. قازىرگى ۋاقىتتا جۇيە اعىلشىن جانە تاي تىلدەرىندە جۇمىس ىستەيدى جانە تۋريستىك پوليتسيانىڭ جەدەل ارەكەت ەتۋ ورتالىعىمەن تىكەلەي بايلانىسقان.

ت ا ت وكىلدەرىنىڭ ايتۋىنشا، تۋريستىك پوليتسيا تاي پوليتسياسىنىڭ ءبىر بولىگى جانە تۋريستەردىڭ قاۋىپسىزدىگىن قامتاماسىز ەتەدى. ۆەدومستۆو شتابىندا تايلاندتىڭ بارلىق ايماعى بويىنشا 1,9 مىڭ پوليتسەي جۇمىس ىستەيدى، نەگىزىنەن بۇل تۋريستىك ايماقتار: بانگوك، پحۋكەت، سامۋي جانە چيانگماي.