08:25, 20 - شىلدە 2022 | GMT +5
سارىاعاشتىقتار اۋىلداستارىنا ءۇي سالىپ بەردى
سارىاعاش. قازاقپارات- سارىاعاش اۋدانى، جىبەك جولى اۋىلىنىڭ ازاماتتارى 4 جىلدا 6 ءۇي سالىپ، تۇرمىسى تومەن وتباسىلارعا تارتۋ ەتتى، دەپ حابارلايدى قازاقپارات ءتىلشىسى.
يگى ىسكە ۇيىتقى بولعاندار ىشىندە تاكسي جۇرگىزۋشىلەرى كوپ. قازىر جالعىزباستى انا كۋلايم قوشانوۆاعا ارنالعان ءۇيدىڭ ىشكى ارلەۋ جۇمىستارى ءجۇرىپ جاتىر. شىلدە ايىنىڭ سوڭىنا قاراي تۇرعىن ءۇي قۇرىلىسى تولىعىمەن اياقتالماق. تاكسيستەر بۇدان بولەك ەكى ۇيگە تابيعي گاز كىرگىزىپ، ءبىر ءۇيدىڭ جىلۋ جۇيەلەرىن جوندەپ بەرگەن جانە ءبىر ءۇيدىڭ شاتىرىن اۋىستىرىپ، ءۇي يەلەرىنىڭ العىسىن الىپتى. سونىمەن قاتار تۇرمىس دەڭگەيى تومەن الەۋمەتتىك قولداۋدى قاجەت ەتەتىن وتباسىلارعا ۇنەمى ازىق-تۇلىكپەن جانە باسقا دا ماتەريالدىق كومەكتەر مەن قايىرىمدىلىق كورسەتۋدە ءوز ۇلەستەرىن قوسۋدا.
