جاستاردى جۇمىسپەن قامتۋدىڭ كەشەندى شارالارى قاراستىرىلىپ وتىر - تامارا دۇيسەنوۆا

اتىراۋ. قازاقپارات - ەلىمىزدە جاستاردى جۇمىسپەن قامتۋدىڭ كەشەندى شارالارى قاراستىرىلىپ وتىر. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا اتىراۋلىق بەلسەندى جاستارمەن كەزدەسۋدە ءمالىم ەتتى، دەپ حابارلايدى قازاقپارات.

ءمينيستردىڭ پىكىرىنشە، مەملەكەت باسشىسىنىڭ تاپسىرمالارىن ورىنداۋ اياسىندا جاستاردى ناتيجەلى جۇمىسپەن قامتۋعا باعىتتالعان كەشەندى شارالار جۇزەگە اسىرىلىپ جاتىر.

«ۇلتتىق جوبالار مەن بيزنەستىڭ جەكە باستامالارى شەڭبەرىندە قۇرىلاتىن بارلىق جۇمىس ورىندارى ەلەكتروندىق ەڭبەك بيرجاسىندا ورنالاستىرىلادى. بۇل پلاتفورما بوس جۇمىس ورىندارىن ىزدەۋدىڭ دە، قىزمەتكەرلەردى ىزدەۋدىڭ دە ءبىرىڭعاي الاڭىنا اينالادى. قازىر ەلەكتروندىق ەڭبەك بيرجاسىندا جۇمىس بەرۋشىلەردەن 108 مىڭنان استام بوس جۇمىس ورنى ۇسىنىلدى. ونىڭ ىشىندە ىسكە اسىرىلىپ جاتقان ۇلتتىق جوبالار شەڭبەرىندە 10,4 مىڭ بوس جۇمىس ورنى بار»، - دەدى تامارا دۇيسەنوۆا.

جاستاردى ءىرى وندىرىستىك كاسىپورىندارعا جۇمىسقا ورنالاستىرۋ جوباسى باستى باعىتقا اينالىپ وتىر.

وعان ءبىرىنشى بولىپ ERG كومپانيالار توبى قوسىلىپ، ەلەكتروندىق ەڭبەك بيرجاسىندا بوس ورىندار ءتىزىمىن ۇسىنعان.

وسىلايشا، 200 دەن استام جاس مامان جۇمىسقا ورنالاستىرىلعان. جاقىندا باسقا كومپانيالاردان بوس جۇمىس ورىندارى ۇسىنىلادى.

«وتكەن ايدا ەلەكتروندىق ەڭبەك بيرجاسىندا قازاقستانداعى العاشقى ونلاين-جارمەڭكەنى وتكىزدىك. ءىس-شارا 35 جاسقا دەيىنگى جاستاردى جۇمىسقا ورنالاستىرۋعا باعىتتالدى. جارمەڭكەگە 23 ءىرى كومپانيا، بانكتەر مەن ساۋدا جەلىلەرى قاتىسىپ، 1330 بوس جۇمىس ورنىن ۇسىندى. جۇمىس ىزدەۋشىلەردەن 3,5 مىڭ تۇيىندەمە ءتۇستى. قازىر جۇمىس بەرۋشىلەر تاڭدالعان كانديداتتارعا ودان ءارى باعالاۋ جۇرگىزىپ جاتىر. مۇنداي جارمەڭكەلەر تۇراقتى وتكىزىلەدى»، - دەدى مينيستر.

تاعى ءبىر ماڭىزدى باعىت - كاسىپكەرلىكتى دامىتۋ جونىندەگى ۇلتتىق جوبا شەڭبەرىندە جاس كاسىپكەرلەر مەن ستارتاپ-جوبالاردى قولداۋ.

بيىل جاستاردىڭ بيزنەس-يدەيالارىن جۇزەگە اسىرۋعا 10 مىڭ گرانت بولىنگەن. ءوتىنىم جولداۋدان گرانت بەرۋگە دەيىنگى پروتسەسس Business Enbek پلاتفورماسىنىڭ كومەگىمەن تولىق اۆتوماتتاندىرىلعان.

وندا ۇمىتكەرلەر بارلىق قاجەتتى قۇجاتتى ەلەكتروندىق فورماتتا تولتىرادى.

تامارا دۇيسەنوۆانىڭ ايتۋىنشا، ەڭبەك نارىعىندا قيىندىقتارعا تاپ بولعان جاستار جۇمىس ورىندارىن سۋبسيديالاۋ بويىنشا جوو مەن كوللەدج تۇلەكتەرىنە ارنالعان جاستار پراكتيكاسىنا قاتىسا الادى. سونداي-اق، ءبىلىمى مەن جۇمىس تاجىريبەسى جوق جاستارعا ارنالعان «العاشقى جۇمىس ورنى» جوباسى بار.

ەسكە سالا كەتەلىك، بۇدان بۇرىن تەڭىزدەگى جوبادان بوسايتىنداردى جۇمىسقا ورنالاستىرۋ جونىندە جول كارتاسى ازىرلەنگەنىن جازعان ەدىك.