ەلىمىزدە ءۇشىنشى، ءتورتىنشى، بەسىنشى بالانىڭ ومىرگە كەلۋ ءۇردىسى بايقالادى - تامارا دۇيسەنوۆا
كوپ بالالى وتباسىلاردى، مۇگەدەكتىگى بار ادامداردى الەۋمەتتىك قولداۋ شارالارىن، ازىرلەنىپ جاتقان الەۋمەتتىك كودەكستە قازاقستاندىقتاردى زەينەتاقىمەن قامتاماسىز ەتۋ جۇيەسىن جاقسارتۋدىڭ جاڭا تاسىلدەرىن ءتۇسىندىردى، دەپ حابارلايدى قازاقپارات. ءمينيستردىڭ ايتۋىنشا، تاۋەلسىزدىك جىلدارى قازاقستاندا ازاماتتاردى الەۋمەتتىك قولداۋدىڭ كەشەندى جۇيەسى قۇرىلدى. وندا مەملەكەتتىك جاردەماقىلار، الەۋمەتتىك تولەمدەر، جۇمىسپەن قامتۋعا جاردەمدەسۋ جونىندەگى شارالار، ءومىردىڭ بارلىق كەزەڭىندە سالىق سالۋ جەڭىلدىكتەرى قامتىلعان.
«بىلتىر مەملەكەتتىڭ بيۋدجەتىنەن 4,9 ميلليون ازاماتقا زەينەتاقى مەن الەۋمەتتىك تولەمدەردى تولەۋگە شامامەن 4 تريلليون تەڭگە ءبولىندى. بۇل - ەل بيۋدجەتىنىڭ تورتتەن ءبىر بولىگى. اتىراۋ وبلىسىندا بىلتىر زەينەتاقى مەن جاردەماقى الۋشىلار سانى 193,5 مىڭ ادامدى نەمەسە وبلىس حالقىنىڭ جالپى سانىنىڭ %29,3 ىن، تولەمدەردىڭ جالپى سوماسى 125,6 ميلليارد تەڭگەنى قۇرادى. بيىل 1-قاڭتاردان باستاپ بازالىق زەينەتاقى مەن جاردەماقى مولشەرى %5 عا، ىنتىماقتى زەينەتاقى %7 يندەكستەلدى. ال، 1-ساۋىردەن باستاپ ينفلياتسيا ءدالىزىن قايتا قاراۋعا بايلانىستى زەينەتاقى مەن جاردەماقى قوسىمشا %4 يندەكستەلدى»، - دەدى تامارا دۇيسەنوۆا.
مينيستر مالىمەتىنە سۇيەنسەك، بالالى وتباسىلاردى الەۋمەتتىك قولداۋعا بيۋدجەتتەن تولەنەتىن جاردەماقىنىڭ 5، مەملەكەتتىك الەۋمەتتىك ساقتاندىرۋ قورىنان تولەنەتىن تولەمدەردىڭ 2 ءتۇرى كىرەدى. بيىل بۇل ماقساتقا 38,3 ميلليارد تەڭگە ءبولىنىپ، وتكەن جىلمەن سالىستىرعاندا %13 عا ارتقان.
«ەلىمىزدە قابىلدانىپ جاتقان الەۋمەتتىك قولداۋ شارالارى دەموگرافيالىق جاعدايدى جاقسارتۋعا مۇمكىندىك بەردى. ماسەلەن، 2020 -جىلى 426,8 مىڭ، ال، 2021 -جىلى 446,8 مىڭ بالا ومىرگە كەلدى. وسى ورايدا ءۇشىنشى، ءتورتىنشى، بەسىنشى جانە ودان دا كوپ بالانىڭ ومىرگە كەلۋ ءۇردىسى بايقالادى» - دەيدى مينيستر.
قازىر مۇگەدەكتىگى بار ادامداردى تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتۋ الەۋمەتتىك قىزمەتتەر پورتالى ارقىلى جۇزەگە اسىرىلادى. پورتالدا مۇگەدەك ادامداردى وڭالتۋدىڭ تەحنيكالىق قۇرالدارىن، ساناتورلىق- كۋرورتتىق ەمدەۋ، جەكە كومەكشىنىڭ، ىمداۋ ءتىلى مامانىنىڭ قىزمەتتەرىن، ولاردى جەتكىزۋشىلەردى ءوز بەتىنشە تاڭداي الادى. جىل باسىنان بەرى اتىراۋ وبلىسىنىڭ تۇرعىندارى پورتال ارقىلى 11 مىڭنان استام وڭالتۋ شارالارىن العان.
«الەۋمەتتىك قىزمەتتەر پورتالى ارقىلى وڭالتۋ قۇرالدارى مەن قىزمەتتەرىمەن قامتاماسىز ەتۋ ۋاقىتىن 8 ايدان 2 اپتاعا دەيىن قىسقارتۋعا، مۇگەدەكتىگى بار ادامدارعا كورسەتىلەتىن قىزمەتتەر مەن وڭالتۋ قىزمەتتەرىمەن قامتۋدى تاڭداۋدى ءونىم بەرۋشىدەن جەكە قاجەتتىلىگىن، ساپاسىن، بەدەلىن جانە باسقا پايدالانۋشىلاردىڭ پىكىرلەرىن ەسكەرە وتىرىپ، تىكەلەي ۇسىنۋعا بولادى. مۇگەدەكتىگى بار ادامداردىڭ قاي جەردە ورنالاسقانىنا قاراماستان، وڭالتۋ قۇرالدارى مەن قىزمەتتەرىن تاڭداۋىنا مۇمكىندىك بەرۋ، مىسالى، ءساناتورييدى اۋرۋىنا بايلانىستى باسقا ايماقتان تاڭداۋىنا مۇمكىندىك بەرىلىپ وتىر. الايدا، وڭالتۋ قۇرالدارىنىڭ ساپاسىنا، جەتكىزۋشىلەر ۇستاناتىن باعا ساياساتىنا قاتىستى ماسەلەلەر ءالى دە بار. سوندىقتان، بۇل باعىتتاعى جۇمىستاردى جاقسارتۋ جالعاساتىن بولادى»، - دەدى تامارا دۇيسەنوۆا.
ەسكە سالا كەتەلىك، بۇدان بۇرىن تامارا دۇيسەنوۆا جۇمىسشىلاردىڭ ەڭبەك قۇقىعىن قورعاۋعا ەرەكشە نازار اۋدارۋ قاجەتتىگىن ايتقان ەدى. سونداي- اق، تەڭىزدەگى جوبادان بوسايتىنداردى جۇمىسقا ورنالاستىرۋ جونىندە جول كارتاسى جاسالدى.
