ەلوردادا بيزنەس ورتالىقتارى جانىنداعى تۇراقتاردان شلاگباۋمدى الىپ تاستاۋ قاجەت - شىڭعىس دوسىبايەۆ

نۇر- سۇلتان. قازاقپارات - ەلوردانىڭ بيزنەس ورتالىقتارى جانىنداعى تۇراقتاردان شلاگباۋمداردى الىپ تاستاۋ قاجەت.

مۇنداي ۇسىنىستى «استانا كولىك تۇراعى كەڭىستىگى» ج ش س- نىڭ ديرەكتورى شىڭعىس دوسىبايەۆ جاسادى، دەپ حابارلايدى قازاقپارات ءتىلشىسى.

«ولار (بيزنەس ورتالىقتارى) كولىك تۇراعى اۋماعىن شلاگباۋممەن جاۋىپ الىپ، ارنايى ءتىزىم ازىرلەيدى جانە وزدەرىنىڭ باسىمدىققا يە قوناقتارىنا رۇقساتپەن كىرۋ تەحنيكالىق شەشىمىن جاساپ العان. ال بۇل كوشەلەردىڭ جول جەلىسىندە كولىك كوللاپسىن تۋىنداتادى. بيزنەس ورتالىقتىڭ باسىم بولىگى جۇرت كوپ جينالاتىن جەردە شوعىرلانعان جانە كەلگەن ادامدار كىرە الماي جاتادى. سونىڭ كەسىرىنەن «نۇرجول» جەلەكجولىنداعىداي كولىك كەپتەلەسى ورىن الادى. ايتالىق، «ەميرالد تاۋەر» عيماراتى مەملەكەت جەرىنە شلاگباۋم جۇيەسىن ەنگىزىپ، ءار كولىكتەن 150 تەڭگە الىپ وتىر. ال ءبىز قالانىڭ بارلىق تۇرعىنىنا بىردەي جاعداي جاساعىمىز كەلەدى»، - دەدى ول استانانىڭ كاسىپكەرلەر پالاتاسى وتىرىسىندا.

ونىڭ اتاپ وتۋىنشە، ءدال وسىنداي جاعداي «ماردەن» بيزنەس ورتالىعىندا ورىن العان. «ولار دا شلاگباۋممەن جاۋىپ العان. سوعان بايلانىستى ادامدار كولىكتەرىن بەيبىتشىلىك پەن سەيفۋللين كوشەلەرىندە ەكىنشى قاتارعا قويىپ كەتۋگە ءماجبۇر. ءبىز بۇل شلاگباۋمداردى الىپ تاستاپ، بۇكىل قالادا جۇمىس ىستەپ تۇرعان زاماناۋي اقىلى تۇراقتاردى ورناتۋدى ۇسىنامىز»، - دەدى شىڭعىس دوسىبايەۆ.