ىستىقتا دەنساۋلىقتى قالاي ساقتاۋ كەرەك - دارىگەر كەڭەسى

الماتى. قازاقپارات - سينوپتيكتەر وسى اپتادا قازاقستاننىڭ وڭتۇستىگىندە اۋا تەمپەراتۋراسى قىرىق گرادۋسقا دەيىن كوتەرىلەتىنىن ايتقان بولاتىن.

وسىعان بايلانىستى الماتىلىق دارىگەر ءبىرقاتار كەڭەس بەردى، دەپ حابارلايدى قازاقپارات ءتىلشىسى.

ورتالىق كلينيكالىق اۋرۋحانانىڭ جالپى تاجىريبەلىك دارىگەرى ارينا كيرديايكينانىڭ ايتۋىنشا، اپتاپ ىستىق اسىرەسە، گيپەرتونيكتەر، ەگدە جاستاعى ادامدار مەن بالالار ءۇشىن وتە قاۋىپتى.

«كۇننىڭ ىستىعىنان ەرەسەك ادامداردىڭ قان قىسىمى كوتەرىلەدى، كريزدەر، ينسۋلتتەر جيىلەيدى، بالالارعا كۇن وتەدى، باس اۋىرادى، لوقسۋ، قۇسۋ، ءتىپتى تالىپ قالۋ جاعدايلارى دا كەزدەسەدى. سوندىقتان كۇن قاتتى ىسىعان كەزدە تۇسكى ساعات 12:00 دەن كەشكى ساعات 17:00 گە دەيىن سەرۋەنگە شىقپاعان ءجون، كۇننەن قورعايتىن باس كيىم كيىڭىزدەر، قولشاتىر ۇستاڭىزدار»، - دەيدى مامان.

سونىمەن قاتار، دارىگەر اعزادا سۋسىزدانۋدى بولدىرماۋ ءۇشىن سۇيىقتىقتى جەتكىلىكتى مولشەردە ءىشۋ كەرەكتىگىن اتاپ ءوتتى.

«سونىمەن بىرگە، بولمە تەمپەراتۋراسىنداعى سۋدى ىشۋگە كەڭەس بەرەمىن. سەبەبى، قاتتى سۋىق سۋ ءشولدى قاندىرمايدى جانە تاماق اۋرۋىن تۋعىزۋى مۇمكىن. دەنى ساۋ ادامداردا سۋدىڭ كولەمى تاۋلىگىنە ءۇش ليتردەن اسپاۋى ءتيىس، باسقالاردا ەكىدەن اسپاۋى كەرەك. فيزيكالىق جۇكتەمەنى شەكتەۋ قاجەت، ويتكەنى اعزا ونسىز دا ارتىق سالماق كوتەرىپ تۇر، تەر قاتتى بولىنەدى، ءجيى دۋش قابىلداۋدى، شومىلۋدى ۇمىتپاڭىزدار»، - دەدى دارىگەر.

قازگيدرومەتتىڭ 19-شىلدەگە ارنالعان اۋا رايى بولجامى بويىنشا، الماتى قالاسىندا كوشپەلى بۇلت شىعادى. اۋانىڭ تەمپەراتۋراسى تۇندە 19-21، كۇندىز 30-32 گرادۋس ىستىق بولادى.