قازاقستان اۆتوتراسسالارىندا «ورتاشا جىلدامدىق» جۇيەسى ەنگىزىلۋى مۇمكىن

نۇر- سۇلتان. قازاقپارات - قازاقستاندا «ورتاشا جىلدامدىق» جۇيەسىن ەنگىزۋ جوسپارلانىپ وتىر. بۇل تۋرالى ق ر ىشكى ىستەر مينيسترلىگى اكىمشىلىك پوليتسيا كوميتەتى ءتوراعاسىنىڭ ورىنباسارى جاندوس مۇراتاليەۆ ايتتى، دەپ حابارلايدى قازاقپارات ءتىلشىسى.

«ءبىز كەيدە جەرگىلىكتى اتقارۋشى ورگاندارعا تراسسالاردا باعدارشام وبەكتىلەرىن، جىلدامدىق ولشەگىشتەردى ورناتۋدى ۇسىنامىز. بۇل شارالار، ارينە، ءبىر جىل بۇرىن بيۋدجەتتە جوسپارلانادى، قارالادى، ساراپتامادان وتەدى، كونكۋرستار وتكىزىلەدى. بيىل كوپتەگەن وڭىرلەردە قوسىمشا «سەرگەك» كامەرالارىن ورناتۋ قاراستىرىلعان»، - دەدى ج. مۇراتاليەۆ.

سپيكەر اۆتوتراسسالارداعى فوتو جانە بەينەتىركەۋ قۇرالدارى سانى جىل سايىن ارتاتىنىن ايتتى. سونداي- اق، ج. مۇراتاليەۆ يندۋستريا جانە ينفراقۇرىلىمدىق دامۋ مينيسترلىگى «ورتاشا جىلدامدىق» جۇيەسىن ەنگىزۋدى ۇسىنعانىن ايتتى.

ازىرگە بۇل ۇسىنىس باسقا مەملەكەتتىك ورگاندارمەن تالقىلانىپ جاتىر. «ورتاشا جىلدامدىق» جۇيەسى بەلگىلى ءبىر اۆتوتراسسانىڭ بويىندا «سەرگەك» كامەرالارىن ورناتۋدى كوزدەيدى. مىسالى، نۇر- سۇلتان- بۋراباي تاسجولىندا ەكى جەرگە كامەرا ورناتۋ جەتكىلىكتى بولادى. بۇل رەتتە، اۆتوكولىك بەلگىلى ءبىر ۋچاسكەدەن شەكتەن اسقان جىلدامدىقپەن وتسە، جۇرگىزۋشىگە ايىپپۇل تۋرالى حابارلاما كەلەدى»، - دەدى ج. مۇراتاليەۆ.

بۇعان دەيىن جاندوس مۇراتاليەۆ جول قوزعالىسى قاۋىپسىزدىگى ايلىعى باستالعانىن، اسىرەسە تۇنگى ۋاقىتتاعى جول قوزعالىسىن باقىلاۋ كۇشەيەتىنىن ايتقان ەدى.

اۆتور: ايجان سەرىكجان قىزى