عالىمدار ەنەرگيا بولەتىن الما اعاشىن ويلاپ تاپتى

نۇر- سۇلتان. قازاقپارات – ەنەرگيا بولەتىن الما اعاشى. نەمىس عالىمدارى وسىنداي تىڭ ەكولوگيالىق جوبانى قولعا الدى، دەپ حابارلايدى «حابار 24».

قازىر ولار گەلسدورف زەرتتەۋ ورتالىعىندا ارنايى تاجىريبە جۇرگىزىپ جاتىر. الما باعىنىڭ ۇستىنەن كۇن باتارەيالارى ورناتىلعان. الىنعان ەنەرگيامەن ەلەكتر- تراكتورىن قۋاتتايدى. وعان قوسا، بۇل قۇرىلىمدار اعاشتاردى قورعايدى. ەكى ءتۇرلى مودۋل الما اعاشىنا قاجەت جارىقتىڭ 50 پروتسەنتىن وتكىزەدى. ەكولوگيالىق جۇيەنىڭ قۋاتتىلىعى 250 كيلوۆاتتقا جەتەدى.

عالىمداردىڭ ايتۋىنشا، المانى وسىلاي ءوسىرۋ ءۇشىن كوپ جەر قاجەت ەمەس. ءارى كۇن باتارەياسىن ورناتۋعا دا قوسىمشا ايماقتىڭ كەرەگى جوق.

كريستيان ناحتۆەي، شارۋا:

- ءبىر وقپەن ەكى قويان اتۋدى كوزدەپ وتىرمىز. ياعني كۇن ەنەرگياسىنىڭ ءوندىرىسى مەن وسىمدىكتەردى قورعاۋدى ماقسات ەتتىك. اعاشتاردى نوسەر، بۇرشاق، قاتتى جەل مەن قۋراپ قالۋدان وسىلاي ساقتاعىمىز كەلەدى.