ايەلىڭ جاقسى بولسا

نۇر- سۇلتان. قازاقپارات - قاز داۋىستى قازىبەك پەن الىبەك باتىر ەل ارالاپ كەلە جاتسا، جول بويىندا ءبىر قاريا جولىعادى.

قارياعا سالەم بەرىپ، الىبەك باتىر مىناداي ساۋال قويادى:

- ۋا، اقساقال، اۋىل بەرەكەسى قايتسە كەتەدى؟ اقساقال ءسال ويلانىپ بىلاي دەيدى: - اۋىل اقساقالى شالا بولسا، جىگىتتەرى التى اۋىزدى الا بولسا، جاسى ۇلكەنىنە جاسى كىشىسى سەن دەسە، سول اۋىلدىڭ بەرەكەسى كەتەدى. سوندا قاز داۋىستى قازىبەك بي تۇرىپ:
- ۋا، قاريا، ال ءۇي بەرەكەسى قايتسە كەتەدى؟ - دەيدى.
- ايەلىڭ قاباعىن ءتۇيىپ كەرىلسە، شاي قۇيىپ بەرۋگە ەرىنسە، ۇلىڭ ۇرىسقا ساي بولسا، كەلىنىڭ كەرىسكە ساي بولسا، قىزىڭ سۋماقاي بولسا، سول ءۇيدىڭ بەرەكەسى كەتەدى، - دەگەن ەكەن قاريا.
- ال اقساقال، نە جاقسى؟
اقساقال مۇدىرمەي جاۋاپ بەرىپتى:
- اتىڭ جاقسى بولسا - تىرشىلىكتە مىنگەن پىراعىڭ. بالاڭ جاقسى بولسا - جانىپ تۇرعان شىراعىڭ. ايەلىڭ جاقسى بولسا - دوسىڭ جانىڭا جينالىپ، ريزا بولار قوناعىڭ.

- ال نە جامان؟
- اتىڭ شابان بولسا - تىرشىلىكتە كورگەن ازابىڭ. بالاڭ جامان بولسا - عۇمىرلىق كورگەن ازابىڭ. ايەلىڭ جامان بولسا - دوسىڭ سەنەن بەزىنىپ، ۇيىڭنەن كەتەر قوناعىڭ، - دەپتى قاريا.

Massaget.kz