ا ق ش، پاكىستان، ءۇندىستان... - قازاقستان ارمياسىنىڭ جوعارى وفيتسەرلىك قۇرامى قاي ەلدەردە ءبىلىم الادى

نۇر- سۇلتان. قازاقپارات - قازاقستان قارۋلى كۇشتەرىنىڭ جوعارى وفيتسەرلىك قۇرامى الەمنىڭ التى بىردەي مەملەكەتىندە ءبىلىم الادى. بۇل جايىندا ق ر قورعانىس مينيسترلىگى اپپارات باسشىسىنىڭ مىندەتىن ۋاقىتشا اتقارۋشىنىڭ قازاقپارات ساۋالىنا جولداعان جاۋابىندا ايتىلعان.

«قارۋلى كۇشتەردىڭ جوعارى تۇرعان قولباسشىلىق لاۋازىمدارىنا ادام ىرىكتەۋ ءتارتىبى ق ر پرەزيدەنتىنىڭ 2006 -جىلعى 25- مامىرداعى № 124 جارلىعىمەن بەكىتىلگەن. جوعارى وفيتسەرلىك قۇرامعا قويىلاتىن تالاپتار ق ر قارۋلى كۇشتەرىندە، باسقا دا اسكەرلەرى مەن اسكەري قۇرالىمدارىندا اسكەري قىزمەت وتكەرۋ قاعيدالارىنىڭ 53 جانە 86-1-تارماقتارىندا كوزدەلگەن. قاڭتار وقيعاسىنا بايلانىستى وزگە تالاپتاردى ەنگىزۋ جانە تولىقتىرۋ قازىرگى ۋاقىتتا جوسپارلانىپ وتىرعان جوق»، - دەلىنگەن مينيسترلىكتىڭ جاۋابىندا.

رەسمي جاۋاپتا قازاقستان ارمياسىنىڭ قاتارى ەلىمىزدىڭ ەڭ بەدەلدى اسكەري وقۋ ورنىندارىندا ءبىلىم العان كاسىبي دايىندالعان، جوعارى بىلىكتى وفيتسەرلەردەن قۇرالاتىنى ايتىلعان.

«ۇلتتىق قورعانىس ۋنيۆەرسيتەتى ماگيستراتۋرا جانە دوكتورانتۋرا باعدارلامالارى بويىنشا ستراتەگيالىق، جەدەل- ستراتەگيالىق جانە جەدەل- تاكتيكالىق بۋىندار ءۇشىن اسكەري كادرلار دايارلايتىن ورتالىق ازيا وڭىرىندەگى جالعىز جوعارى وقۋ ورنى ەكەنىن اتاپ وتكەن ءجون. سونداي- اق، رەسەي، ا ق ش، بەلارۋس، تۇركيا، پاكىستان، ءۇندىستان سياقتى شەت ەلدەردىڭ اسكەري وقۋ ورىندارىندا دا قازاقستاندىق جوعارى وفيتسەرلىك قۇرام وقىپ، ءبىلىم الادى»، - دەپ جازىلعان جاۋاپتا.

بۇعان دەيىن ەلدەگى اسكەري وقۋ ورىندارىنىڭ 12 ۇزدىك تۇلەگى پرەزيدەنتتىڭ قولىنان وفيتسەر پوگونىن العان ەدى.

اۆتور: ەسىمجان ناقتىباي