21:47, 18 - شىلدە 2022 | GMT +5
ماماندار بايدىبەكتە سۋ قۇبىرىندا جىلاننىڭ قالاي پايدا بولعانىن ءتۇسىندىردى
تۇركىستان. قازاقپارات - بايدىبەك اۋدانى بورالداي اۋىلىندا اۋىز سۋ قۇبىرىنان شىققان جىلانعا قاتىستى «بايدىبەك- سۋ» مەكەمەسىنىڭ ماماندارى تۇسىنىك بەردى، دەپ حابارلايدى قازاقپارات ءتىلشىسى.
ماماندار وقيعا ورنىندا بولىپ، زەردەلەۋ جۇمىستارىن جۇرگىزگەن. «بورالداي اۋىلىنىڭ تۇرعىنى جەكە اۋلاسىنداعى سۋ ەسەپتەگىش قۇرالىن «بايدىبەك سۋ» مەكەمەسىنىڭ رۇقساتىنسىز جانە قاي ۋاقىتتا الىپ تاستاعانى بەلگىسىز. تەكسەرۋ بارىسىندا جانە ۆيدەودان كورىنىپ تۇرعانداي سۋ ەسەپتەگىش قۇرالى بولماعاندىقتان اشىق تۇرعان سۋ قۇبىرىنا جىلان باسىمەن سىرتتان كىرىپ تۇر. 17-شىلدە كۇنى بورالداي ەلدى مەكەنىنىڭ اۋىز سۋ جينايتىن رەزەرۆۋارى مەن قۇبىرلارىنىڭ سۋى تولىق توگىلىپ، بۇگىنگى كۇنى «بايدىبەك سۋ» مەكەمەسى تاراپىنان زالالسىزداندىرۋ (حلورلاۋ) جۇمىسى ءجۇرىپ جاتىر»، - دەيدى «بايدىبەك- سۋ» م ك م باسپا ءسوز حاتشىسى ابزال ءابدىنازار.
ايتا كەتەيىك، بۇگىن تاڭەرتەڭ تۇركىستان وبلىسىنىڭ بايدىبەك اۋدانىنداعى بورالداي اۋىلىندا اۋىز سۋ قۇبىرىنان جىلان شىققان بولاتىن.
