باس پروكۋراتۋرا قاڭتار وقيعاسىن تەرگەۋ بارىسىنا زاڭسىز ارالاسىپ جاتقاندار تۋرالى ايتتى
«قازىرگى ۋاقىتتا جەكەلەگەن ادامدار الەۋمەتتىك جەلىلەر مەن بۇقارالىق اقپارات قۇرالدارى ارقىلى زاڭسىز تالاپتار قويىپ وتىر. ولار قابىلدانعان پروتسەستىك شەشىمدەرمەن كەلىسپەگەندىكتەن، تەرگەۋگە قىسىم كورسەتۋ ماقساتىندا قىلمىستىق ىستەردى تەرگەۋ بارىسىنا ارالاسىپ جاتىر»، - دەدى ەلدوس قيلىمجانوۆ ورتالىق كوممۋنيكاتسيالار قىزمەتىندە.
وسى ورايدا ول قىلمىستىق-پروتسەستىك زاڭنامانىڭ تالاپتارىنا سايكەس، تەرگەۋ ارەكەتتەرىنە قاتىسۋ بويىنشا ادامداردىڭ ناقتى تىزبەسىنە رۇقسات ەتىلگەنىن ەسكە سالدى. ولاردىڭ قاتارىندا ادۆوكاتتار، قورعاۋشى تاراپتىڭ زاڭدى وكىلدەرى، جابىرلەنۋشىلەر بار. بۇل ادامداردىڭ پروكۋراتۋراعا دا، تەرگەۋ سوتىنا دا تەرگەۋ ورگانىنىڭ ءىس-ارەكەتتەرىنە ءوتىنىشحات نەمەسە شاعىم بەرۋگە قۇقىعى بار.
بۇل تۇرعىدا قىلمىستىق-پروتسەستىك كودەكسىندە پروتسەستىك شەشىمدەرگە شاعىم جاساۋدىڭ ناقتى ءتارتىبى ايقىندالعان.
«وسىعان بايلانىستى قىلمىستىق پروتسەسكە قاتىسۋشىلار مەن قورعاۋشىلاردى زاڭنىڭ كورسەتىلگەن نورمالارىن قاتاڭ ساقتاۋعا شاقىرامىن. پروكۋراتۋرا ورگاندارى بارلىق قىلمىستىق ىستەر بويىنشا قىلمىستىق-پروتسەسكە قاتىسۋشىلاردىڭ قۇقىقتارىن ساقتاۋدى قامتاماسىز ەتىپ وتىرعانىن اتاپ وتەمىن. قىلمىستىق ىستەردى تەرگەۋ كەزىندە قۇقىق قورعاۋ جانە ارنايى ورگانداردىڭ قىزمەتىنە ارالاسقانى ءۇشىن جاۋاپتىلىق تۋرالى باس پروكۋراتۋرا بىرنەشە رەت ەسكەرتكەنىن ەرەكشە ايتىپ وتكىم كەلەدى. وزگە ادامداردىڭ سوتقا دەيىنگى تەرگەۋ بارىسىنا ارالاسۋ ارەكەتى ءۇشىن اكىمشىلىك جانە قىلمىستىق جاۋاپتىلىق قاراستىرىلعان»، - دەدى باس پروكۋراتۋرانىڭ وكىلى.
بۇدان بۇرىن حابارلانعانداي، قازىرگى كەزدە ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا 53 جانە تەرروريزم اكتىلەرىنە قاتىستى 32 قىلمىستىق ءىس بار .
مەملەكەتتىك وبەكتىلەردى ورتتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى بولدى.
