قازاقستان اۋماعىندا جول ءجۇرىسى قاۋىپسىزدىگى ايلىعى باستالدى
بۇل تۋرالى ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى جاندوس مۇراتاليەۆ ءمالىم ەتتى، دەپ حابارلايدى قازاقپارات ءتىلشىسى.
«ەل اۋماعىندا 18- شىلدەدەن باستاپ جول ءجۇرىسى قاۋىپسىزدىگى ايلىعى باستالدى. وسىنىڭ اياسىندا پوليتسەيلەر وتكىزەتىن بۇكىل ءىس-شارالاردىڭ باسىم باعىتى - جول-كولىك وقيعالارىن ازايتۋ، جولداعى قاۋىپسىزدىكتى ارتتىرۋ جانە جول جۇرىسىنە قاتىسۋشىلاردىڭ ءومىرى مەن دەنساۋلىعىن ساقتاۋ ءۇشىن ازاماتتاردىڭ نازارىن اۆتوجولدارداعى جاراقاتتانۋ پروبلەمالارىن شەشۋگە باعىتتاۋ»، - دەدى ول مينيسترلىكتىڭ باسپا ءسوز الاڭىندا وتكەن بريفينگتە.
ونىڭ اتاپ وتۋىنشە، جازعى دەمالىس كەزەڭىندە جانە دەمالىس ماۋسىمىندا قالاارالىق جانە ايماقارالىق قاتىناستارداعى كولىك قۇرالدارىنىڭ ترافيگى ءداستۇرلى تۇردە وسەدى.
سونىمەن قاتار ول كەزەڭدە سالدارى ەڭ قايعىلى جاعدايعا اكەپ سوقتىراتىن جول-كولىك وقيعالارىنىڭ ءوسۋ قاۋپى دە ارتادى.
«وسىعان بايلانىستى، ءىس-شارا اياسىندا پوليتسەيلەر پاترۋلدەۋ كەزىندە، اۆتوكولىك قۇرالدارىن، ونىڭ ىشىندە جولاۋشىلار كولىگىن تەكسەرۋدى كۇشەيتەدى. جول-كولىك وقيعالارىنىڭ نەگىزگى سەبەپتەرى، ءبىرىنشى كەزەكتە، جۇرگىزۋشىلەردىڭ تارتىپسىزدىگى سانالادى. سونىڭ سالدارىنان قاراما-قارسى ءجۇرىس جولاعىنا شىعۋ، قوزعالىس جىلدامدىعىن ارتتىرۋ، مانيەۆر جاساۋ قاعيدالارىن بۇزۋ، سونىمەن قاتار، كولىكتى كوپ جاعدايدا شارشاڭقى كۇيدە باسقارۋ دەگەن سياقتى قۇقىق بۇزۋشىلىقتار ورىن الادى. بۇل رەتتە بالالاردىڭ اۆتوموبيل سالونىندا بولۋى جۇرگىزۋشىلەردى جول ءجۇرىسى قاعيدالارىن بۇزۋدان توقتاتا بەرمەيدى»، - دەدى جاندوس مۇراتاليەۆ.
