جىل باسىنان بەرى قازاقستاندا ۇرلانعان كولىك سانى بەلگىلى بولدى

نۇر-سۇلتان. قازاقپارات - بيىل قازاقستان اۋماعىندا 245 كولىك ۇرلىعى تىركەلدى.

بۇل تۋرالى ق ر ىشكى ىستەر مينيسترلىگىنەن ءمالىم بولدى، دەپ حابارلايدى قازاقپارات ءتىلشىسى.

«جىل باسىنان بەرى 245 كولىك ۇرلىعى تىركەلىپ، سونىڭ 158 ى بويىنشا قىلمىستىڭ بەتى اشىلدى. بۇل ىستەر سوتقا جولداندى. وسى ۇرلانعان كولىكتەردىڭ 94 ى يەلەرىنە قايتارىلدى»، - دەلىنگەن ۆەدومستۆونىڭ قازاقپارات اگەنتتىگىنە بەرگەن مالىمەتىندە.

سونىمەن قاتار، مينيسترلىك ۇرلانعان كولىكتەردى كورشىلەس ەلدەردەن قازاقستان اۋماعىنا كىرگىزۋ ارەكەتتەرىنە قاتىستى سۇراققا جاۋاپ بەردى.

«ونداي فاكتىلەر، ارينە، از كەزدەسپەيدى. بيىلدىڭ باسىنان قازىرگى ۋاقىتقا دەيىن ەلىمىزدە كورشىلەس مەملەكەتتەردە ۇرلانعان اۆتوكولىكتەردىڭ 32 سى انىقتالدى. ولاردىڭ ءبارى تاركىلەنىپ الىندى»، - دەپ اتالىپ وتكەن ىشكى ىستەر مينيسترلىگىنىڭ دەرەكتەرىندە.