اتىراۋدا اتتراكسيوننان قۇلاعان ءتورت بالا جاراقات العان

اتىراۋ. قازاقپارات - اتىراۋ قالاسىندا اتتراكسيوننان قۇلاعان ءتورت بالا جەڭىل جاراقات العان. ءبىراق، بالالاردىڭ اتا- انالارىنان شاعىم تۇسپەگەن.

قازىر اتتراكسيون ۋاقىتشا جابىلدى، دەپ حابارلايدى قازاقپارات. بۇدان بۇرىن اتىراۋدا اتتراكسيوننىڭ اتكەنشەگى ءۇزىلىپ، بالالار جەرگە قۇلاعانىن حابارلاعان ەدىك.

وبلىستىق پوليتسيا دەپارتامەنتىنىڭ باسپا ءسوز قىزمەتى مالىمەتىنشە، اتالعان فاكتىگە قاتىستى ق ر قىلمىستىق كودەكسىنىڭ 141-بابى (بالالاردىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ) بويىنشا تەرگەۋ جۇرگىزىلىپ جاتىر. وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنىڭ مالىمەتىنە سۇيەنسەك، «كەرەمەت جاعالاۋ» اتتراكسيونىنداعى اتكەنشەكتىڭ قۇلاۋىنان ءتورت بالا زارداپ شەككەن.

«اتتراكسيونداعى اتكەنشەك قۇلاعان كەزدە جەدەل جاردەم بريگاداسى شاقىرىلدى. جەدەل جاردەم بريگاداسى زارداپ شەككەن ءتورت بالانى وبلىستىق بالالار اۋرۋحاناسىنا جەتكىزدى. اۋرۋحانا دارىگەرلەرى زارداپ شەككەن بالالاردى تولىق مەديتسينالىق تەكسەرۋدەن وتكىزىپ، ولاردىڭ جاراقاتى جەڭىل ەكەنىن انىقتادى. بالالار ۇيىنە جىبەرىلدى. ەندى ولار تۇرعىلىقتى مەكەنجايى بويىنشا ۋچاسكەلىك دارىگەرلەردىڭ باقىلاۋىندا بولادى»، - دەپ حابارلادى باسقارمانىڭ باسپا ءسوز قىزمەتى.

ال، «كەرەمەت جاعالاۋ» بالالار ويىن الاڭىنىڭ باسقارۋشىسى ماناس سەرىكقاليەۆتىڭ ايتۋىنشا، جەڭىل جاراقات العان بالالاردىڭ اتا- انالارىنان شاعىم تۇسپەگەن.

«بىزگە جاراقات العان بالالاردىڭ اتا- انالارى قولحاتىن بەردى. ولاردىڭ تاراپىنان شاعىم تۇسكەن جوق. زارداپ شەككەن بالالار ءۇش كۇنگە دەيىن ءبىزدىڭ دە باقىلاۋىمىزدا بولادى. اتتراكسيونداعى اتكەنشەك ورىندىقتارى بەكىتىلگەن جەلىنىڭ ۇزىلۋىنە بايلانىستى تەكسەرۋ جۇرگىزىلەدى. ونىڭ سەبەبى تەكسەرۋ اياقتالعان سوڭ قوسىمشا حابارلانادى. ءقازىر ويىن الاڭى جابىلدى»، - دەپ ءمالىم ەتتى «كەرەمەت جاعالاۋ» بالالار ويىن الاڭىنىڭ باسقارۋشىسى ماناس سەرىكقاليەۆ.