وسكەمەندە قاڭتار وقيعاسىنا قاتىسقان جەتى ادام سوتتالدى

وسكەمەن. قازاقپارات - وسكەمەن قالاسىندا قاڭتار وقيعاسىندا جاپپاي تارتىپسىزدىككە قاتىسقان جەتى ادام سوتتالدى، دەپ حابارلايدى قازاقپارات ءتىلشىسى.

قالالىق سوت قاڭتار وقيعاسىنا قاتىسقان 7 ادامعا ۇكىم شىعاردى. ولار 5-6- قاڭتار كۇندەرى ەلدى جاپپاي تارتىپسىزدىككە شاقىرعانى جانە بۇلىككە وزدەرى قاتىسقانى ءۇشىن ق ر قىلمىستىق كودەكسىنىڭ 272-بابى بويىنشا كىنالى دەپ تانىلدى.

«جەتەۋى دە ءوز قىلمىستارىن مويىندادى. سوت جازانى جەڭىلدەتەتىن ءمان-جايلاردى ەسكەرە وتىرىپ، ءتورت ايىپتالۋشىنى ءبىر جىل التى ايعا باس بوستاندىعىن شەكتەدى. قالعان ۇشەۋىنە پروباتسيالىق باقىلاۋ بەلگىلەۋمەن 4 جىلعا شارتتى تۇردە باس بوستاندىعىنان ايىرۋ جازاسى تاعايىندالدى»، - دەپ حابارلادى ش ق و پروكۋراتۋراسىنىڭ باسپا ءسوز قىزمەتى.

ايتا كەتەيىك، بۇگىنگى تاڭدا وسكەمەن مەن سەمەي قالالارىنىڭ سوتتارى جاپپاي تارتىپسىزدىككە بارعان تاعى 36 ادامعا قاتىستى 6 قىلمىستىق ءىستى قاراۋدا.