الەۋمەتتىك قۇقىقتاردى ساقتاۋ بويىنشا جاڭا مەحانيزمدەر قاراستىرىلادى - ەڭبەك ءمينيسترى

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەڭبەك نارىعىن مودەرنيزاتسيالاۋ جۇمىستارى تۋرالى ايتىپ بەردى، دەپ حابارلايدى قازاقپارات ءتىلشىسى.

«ەڭبەك نارىعىن مودەرنيزاتسيالاۋدا ءوزىن-ءوزى جۇمىسپەن قامتۋ جانە پلاتفورمالىق جۇمىس رەجيمدەرىن تانۋ، ونى زاڭداستىرۋ ارقىلى ازاماتتارعا ىڭعايلى رەجيمدى ساقتاۋ، ەڭبەك جانە الەۋمەتتىك قۇقىقتاردى ساقتاۋ بويىنشا جاڭا مەحانيزمدەر قاراستىرىلادى. ماقساتتى توپقا كىرەتىن ازاماتتاردى بىرىنشىدەن، مەملەكەت تاراپىنان سۋبسيديالاناتىن جۇمىس ورنىنا تارتۋ، ەكىنشىدەن، الەۋمەتتىك تاپسىرىسپەن جۇمىس ىستەيتىن مەملەكەتتىك ەمەس جانە قوعامدىق ۇيىمدار اياسىن كەڭەيتۋ ارقىلى الەۋمەتتىك جۇمىس ورىندارىن اشۋ قاراستىرىلادى»، - دەدى مينيستر ۇكىمەت ۇيىندە وتكەن وتىرىستا.

ونىڭ ايتۋىنشا، جۇمىس كۇشىنىڭ ۇتقىرلىعىن قامتاماسىز ەتۋ ماقساتىندا ىشكى جانە سىرتقى كوشى-قون ماسەلەلەرىندە جاڭا مەحانيزمدەر ۇسىنىلادى. ازاماتتاردىڭ كاسىبي داعدىلارىن ارتتىرۋ ءۇشىن جاپپاي وقىتۋ مەحانيزمدەرى بەلگىلەنىپ، بۇل جاۋاپكەرشىلىك مەملەكەت، جۇمىس بەرۋشى جانە قىزمەتكەر اراسىندا بولىنەدى.

«جۇمىسپەن قامتۋ ماسەلەسى تولىق سيفرلاندىرىلادى، جۇمىس ىزدەۋ نەمەسە جۇمىسشى ىزدەۋ تەك ەلەكتروندى بيرجا ارقىلى جۇرگىزىلەدى. كوشى-قون ساياساتى جونىندەگى تۇجىرىمداما جوباسى دا ازىرلەنىپ جاتىر. وندا پرەزيدەنتتىڭ قانداستار بويىنشا تاپسىرمالارى تولىق قارالادى، جوبا جىل سوڭىنا دەيىن ۇكىمەتكە بەكىتۋگە بەرىلەدى»، - دەدى تامارا دۇيسەنوۆا.

بۇعان دەيىن ەڭبەك ءمينيسترى 2023-جىلى الەۋمەتتىك تولەمدەر پرواكتيۆتى تۇردە بەرىلەتىنىن ايتقان ەدى.