كەلەسى جىلى الەۋمەتتىك تولەمدەر پرواكتيۆتى تۇردە بەرىلەدى - تامارا دۇيسەنوۆا
بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
مينيستر مەملەكەت باسشىسىنىڭ تاپسىرماسىمەن وتباسى سيفرلىق كارتاسى ازىرلەنىپ جاتقانىن ەسكە سالدى.
«15- تامىزعا دەيىن حالىقتى الەۋمەتتىك قولداۋ سالاسىنداعى وتباسىلاردىڭ اقپاراتى وزەكتەندىرىلەدى. 1- قىركۇيەكتەن باستاپ جىل سوڭىنا دەيىن بەرىلەتىن الەۋمەتتىك قىزمەت پەن الەۋمەتتىك كومەكتىڭ تۇرلەرى پيلوتتى تۇردە جۇرگىزىلەدى. ال 2023-جىلدىڭ 1- قاڭتارىنان باستاپ پرواكتيۆتى قىزمەت الەۋمەتتىك قورعاۋ سالاسى بويىنشا ىسكە اسىرىلادى»، - دەدى مينيستر ۇكىمەت ۇيىندە وتكەن وتىرىستا.
سونىمەن بىرگە، ەڭبەك نارىعىن رەتتەۋ جانە دامىتۋ جوسپارى 8 باعىتتا 15- تامىزعا دەيىن دايارلانادى.
«10 مىڭ تۇرعىنعا 100 جاڭا جۇمىس ورنىن قامتاماسىز ەتۋ ءۇشىن بارلىق ۇلتتىق جوبالار مەن بيزنەستىڭ جەكە باستامالارى اياسىندا جۇرگىزىلەتىن جوبالار مەن جۇمىس ورىندارى ەلەكتروندىق ەڭبەك بيرجاسىندا ورنالاستىرىلادى. بۇل جۇمىس ورىندارى بارلىق قازاقستاندىقتار ءۇشىن قولجەتىمدى بولادى. 25- ماۋسىمنان باستاپ بۇل جۇمىس تولىق قولعا الىندى، مونيتورنگ ەلەكتروندى تۇردە كۇندە جۇرگىزىلەدى»، - دەدى تامارا دۇيسەنوۆا.
