باعدات مۋسين «زەردە» حولدينگىن تاراتۋدى ۇسىندى

نۇر- سۇلتان. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين «زەردە» حولدينگىن رەفورمالاۋ جۇمىستارى تۋرالى ايتىپ بەردى، دەپ حابارلايدى قازاقپارات ءتىلشىسى.

«زەردە» توبىن رەفورمالاۋ جۇمىسى جىل باسىندا باستالعان بولاتىن. ونىڭ ءبىرى - جۇيەلىك ينتەگراتوردىڭ قىزمەتى «سيفرلىق ۇكىمەتتى قولداۋ ورتالىعىنا» بەرىلدى. يننوۆاتسيالاردى دامىتۋدىڭ ءبىرىڭعاي ەكوجۇيەسىن قۇرۋ ماقساتىندا «QazInnovations» اگەنتتىگى مەن استانا حاب تەحنوپاركىن ءبىر ۇيىمعا، ياعني يننوۆاتسيالىق تەحنولوگيالار پاركىنىڭ قۇرامىنا بىرىكتىرۋ ارقىلى وڭتايلاندىرۋ ۇسىنىلادى»، - دەدى ب. مۋسين ۇكىمەت ۇيىندە وتكەن وتىرىستا.

مينيستر ۇلتتىق اقپاراتتىق تەحنولوگيالار اكسيونەرلىك قوعامىن تىكەلەي سيفرلىق دامۋ مينيسترلىگىنىڭ قاراماعىنا بەرىپ، «زەردە» حولدينگىن تاراتىپ جىبەرۋدى ۇسىندى.

«وسى ءۇردىس بارىسىندا حولدينگتىڭ جوبالاردى ىسكە اسىرۋى بويىنشا ءتيىستى ماتەريالداردى قۇزىرلى ورگاندار قاراستىرادى. ەسەپ كوميتەتى تالقىلاۋ كەزىندە حولدينگ قاجەتتىلىگىنە كۇمان كەلتىرگەن بولاتىن. بۇل ۇسىنىس كۆازيمەملەكەتتىك سەكتوردى رەفورمالاۋ تاپسىرماسىنا سايكەس كەلەدى. وسىلايشا، جىل سايىنعى اكىمشىلىك شىعىندار ۇنەمدەلەدى، قاجەتسىز باسقارۋ دەڭگەيىن الىپ تاستاۋ جانە جاۋاپكەرشىلىكتى ناقتىلاۋ سياقتى وڭ ناتيجەلەرگە قول جەتكىزەتىن بولامىز»، - دەدى باعدات مۋسين.