كوروناۆيرۋستىڭ تاراۋىنا بايلانىستى مەملەكەت شەكاراسى جابىلۋى مۇمكىن بە - ءمينيستردىڭ جاۋابى

نۇر- سۇلتان. قازاقپارات – ق ر دەنساۋلىق ساقتاۋ ءمينيسترى اجار عينيات قاي جاعدايدا كوروناۆيرۋستىڭ تارالۋى سالدارىنان قازاقستاننىڭ شەكاراسى جابىلۋى مۇمكىن دەگەن سۇراققا جاۋاپ بەردى، دەپ حابارلايدى قازاقپارات ءتىلشىسى.

«قازىر ينفەكتسيانىڭ ەپيدەميولوگياسى زەرتتەلىپ جاتىر. ەگەر ءبىر ەلدە كوروناۆيرۋستىڭ جاڭا شتامى انىقتالىپ، بۇل ىندەت ءبىزدىڭ ەلدە انىقتالماسا، تەك سوندا عانا شەكارالارداعى شەكتەۋ ءىس- شارالارى جونىندە شەشىم قابىلداناتىن بولادى»، - دەدى ا. عينيات ورتالىق كوممۋنيكاتسيالار قىزمەتىندە.

ونىڭ ايتۋىنشا، قازىرگى كەزدە كوروناۆيرۋس ينفەكتسياسىنىڭ تارالۋىنىڭ قايتالانۋى بايقالىپ وتىر.

«ۆيرۋس تۇرلەنىپ جاتقانىن جانە كلينيكالىق احۋال دا وزگەرىپ جاتقانىن كورىپ وتىرمىز. وسى ۆيرۋستىڭ جاڭا شتامىنىڭ پايدا بولۋى جايىندا ەشتەڭە ايتا المايمىز. قازىرگى كەزدە «دەلتا» ۆيرۋسى كەزىندەگىدەي وكپەنىڭ قاتتى زاقىمدانۋى سالدارى جوق دەسەك بولادى. سوندىقتان ىندەتتى زەرتتەۋ جۇمىستارىن جالعاستىرىپ، ءتيىمدى شەشىمدەر قابىلدايتىن بولامىز»، - دەدى مينيستر.

بۇدان بۇرىن حابارلانعانداي، الەمدە سىرقاتتانۋ دەڭگەيىنىڭ وسۋىمەن قاتار، قازاقستاندا دا 20-ماۋسىمنان باستاپ كوروناۆيرۋس ينفەكتسياسىنا شالدىعۋ دەڭگەيى ءوستى.

سونىمەن قاتار، كوروناۆيرۋس كوپ تارالىپ جاتقان وڭىرلەر بەلگىلى بولدى.

اۆتور رۋسلان عابباسوۆ