مينيستر رەسەيدەن كەتكەن شەتەلدىك كومپانيالاردى قازاقستانعا تارتۋ تۋرالى مالىمەت بەردى

نۇر- سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۇكىمەت وتىرىسىندا رەسەيدەن كەتىپ جاتقان شەتەلدىك كومپانيالاردى قازاقستانعا تارتۋ تۋرالى مالىمەت بەردى، دەپ حابارلايدى قازاقپارات ءتىلشىسى.

«بۇگىنگى تاڭدا بىزدە، رەسەي فەدەراتسياسىمەن اراداعى ونەركاسىپتىك كووپەراتسيا شەڭبەرىندە جالپى قۇنى 22,2 ميلليارد ا ق ش دوللارىن قۇرايتىن 24,9 مىڭ جۇمىس ورنىن قۇرۋعا مۇمكىندىك بەرەتىن 62 جوبا بار. 444 ميلليون ا ق ش دوللارىنا 3,6 مىڭ جۇمىس ورنى بار 14 جوبا ىسكە اسىرىلدى. 11,5 ميلليارد ا ق ش دوللارىنا 4,9 مىڭ جۇمىس ورنىن قۇراتىن 11 جوبا ىسكە اسىرىلىپ جاتىر. 1,4 ميلليارد ا ق ش دوللارىنا 3,7 مىڭ جۇمىس ورنىن قۇراتىن 14 جوبا پىسىقتالۋدا»، - دەدى ۆەدومستۆو باسشىسى.

سونداي- اق، ول پرەزيدەنتىڭ رەسەي نارىعىنان كەتىپ جاتقان كومپانيالارعا قازاقستاندا قولايلى جاعداي جاساۋ تۋرالى تاپسىرماسىنا توقتالدى.

«ءىشىنارا رەلوكاتسيانى ەسكەرە وتىرىپ، 8,9 ميلليارد ا ق ش دوللارىنا 12,6 مىڭ جۇمىس ورنىن قۇراتىن 23 جوبا پىسىقتالۋدا. بارلىق جوبالار ورتا جانە جوعارعى قايتا بولىنىستەگى تاۋارلاردى شىعارۋعا باعىتتالعان»، - دەدى قايىربەك وسكەنبايەۆ.

ەسكە سالساق، پرەزيدەنت قاسىم- جومارت توقايەۆ ۇكىمەتتىڭ كەڭەيتىلگەن وتىرىسىندا رەسەي نارىعىنان كەتىپ جاتقان شەتەلدىك كومپانيالاردىڭ قازاقستاندا جۇمىس ىستەۋىنە جاعداي جاساۋدى تاپسىردى.