قازاقستاندا كوروناۆيرۋسقا قاتىستى قانداي شەكتەۋلەر ەنگىزىلۋى مۇمكىن
مينيستر ەلىمىزدە كوروناۆيرۋسقا قاتىستى ەپيدەميولوگيالىق احۋالدى باعالاۋ ماتريتساسى جاڭا تارتىپتە جۇرگىزىلەتىنىن ايتتى.
«سارى» ايماققا وتكەن كەزدە ينفەكتسيانىڭ تارالۋ وشاعىن وقشاۋلاۋعا قاتىستى قوسىمشا شارالار قابىلدانادى. بۇل رەتتە بيزنەسكە جۇكتەمە تۇسىرمەي، ءتيىستى قادامدار جۇزەگە اسىرىلادى. ال، «قىزىل» ايماققا وتكەن كەزدە، وڭىرلەردە «سارى» ايماق كەزىندە قابىلدانعان ءىس- قيمىلدارعا قوسىمشا تۇرعىنداردىڭ قوزعالىسىن شەكتەۋ مەن كاسىپكەرلىك سۋبەكتىلەرى قىزمەتىنە قاتىستى شارالار قابىلدانادى. بۇل جۇمىستار ەكى كەزەڭ بويىنشا ىسكە اسىرىلادى، سونداي- اق ستاتسيونارلار مەن باستاپقى مەديتسينالىق- سانيتارلىق كومەك مەكەمەلەرىنىڭ جۇكتەمەسى ەسكەرىلەدى. وسى ورايدا، ول قابىلداناتىن شارالار بويىنشا ۇسىنىستار ۆەدومستۆوارالىق كوميسسيانىڭ قاراۋىنا ۇسىنىلاتىنىن ايتتى.
«دەنساۋلىق ساقتاۋ مينيسترلىگى ءتيىستى قادامداردى ازىرلەدى. ۆەدومستۆوارالىق كوميسسيانىڭ كەلەسى وتىرىسىندا بۇل ۇسىنىستار تالقىلاۋعا شىعارىلادى. بۇل تۇرعىدا ك ۆ ي- گە شالدىققاندارمەن قارىم- قاتىناستا بولعاندارعا قاتىستى ماسەلەلەر، ءتيىستى شەكتەۋلەر، ىندەت جۇقتىرعانداردى قاشىقتان جۇمىس ىستەۋگە شىعارۋ ءتارتىبى ەسكەرىلگەن. مۇنىمەن قوسا، قوعامدىق ورىندار مەن قوعامدىق كولىكتە مىندەتتى تۇردە ماسكا تاعۋ بويىنشا شارالار قابىلدانادى»، - دەدى مينيستر.
ۆەدومستۆو باسشىسى ۇشاقپەن ساپارعا شىعۋ، كولىك قوزعالىسىنا جانە شەكاراداعى وتكىزۋ رەجيمىنە شەكتەۋلەر ەنگىزۋ مۇمكىندىگىنە قاتىستى سۇراققا جاۋاپ بەردى.
«مەنىڭ ويىمشا، اسا قاتاڭ شەكتەۋلەر بولمايدى. قازىرگى كەزدە ينفەكسيا دا، ۆيرۋس تا وزگەرىسكە ۇشىراپ، ىندەتكە شالدىققان ادامدار اۋرۋدى جەڭىل ەڭسەرىپ جاتىر. « قىزىل» ايماققا ەنگەن وڭىرلەردە شەكتەۋ شارالارى بولادى، الايدا بۇرىنعىداي كۇشەيتىلگەن ءتارتىپ ەنگىزىلمەيدى»، - دەدى اجار عينيات.
