كوروناۆيرۋس كوپ تارالىپ جاتقان وڭىرلەر بەلگىلى بولدى

نۇر-سۇلتان. قازاقپارات - كوروناۆيرۋس ەلىمىزدىڭ ءىرى قالالارىندا كوپ تارالىپ جاتىر.

بۇل تۋرالى دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات ءتىلشىسى.

«ىندەتتىڭ ەڭ كوپ تارالۋى ەلىمىزدىڭ ەڭ ءىرى مەگاپوليستەرىندە، ياعني الماتى، نۇر-سۇلتان جانە شىمكەنت قالالارىندا بايقالىپ وتىر»، - دەدى ا. عينيات ورتالىق كوممۋنيكاتسيالار قىزمەتىندە.

ونىڭ ايتۋىنشا، سوڭعى اپتادا اۋىرعان ادامداردىڭ 70 پايىزى الماتى (1107 جاعداي نەمەسە %43,2- ى) جانە نۇر-سۇلتان (576 جاعداي نەمەسە %22,5 ى) قالالارىندا تىركەلدى.

«ىندەتتىڭ تارالۋى جاعدايلارىنىڭ وسۋىنە قاراماستان، ناۋقاستاردى اۋرۋحاناعا جاتقىزۋ دەڭگەيى تومەن»، - دەدى مينيستر. بيىلعى 15-شىلدەدەگى جاعداي بويىنشا رەسپۋبليكادا ستاتسيونارلىق كومەك 139 جۇقپالى اۋرۋلار اۋرۋحاناسىندا كورسەتىلىپ جاتىر. ولاردا ناۋقاستاردى قامتۋ ءۇشىن 3282 ورىن جاساقتالعان. قازىرگى كەزدە وسى اۋرۋحانالاردا 570 ناۋقاس ەمدەۋگە جاتقىزىلدى.