مينيستر ابورتقا تىيىم سالۋ ماسەلەسى تۋرالى ايتتى
«باتىس ەلدەردە ابورت ماسەلەسى وتە قىزۋ تالقىلانىپ جاتىر. ا ق ش-تىڭ بىرنەشە شتاتىندا ءتىپتى تىيىم دا سالىندى. بۇل ماسەلە بويىنشا ءسىز نە ويلايسىز»، - دەپ سۇرادى ب ا ق وكىلى ورتالىق كوممۋنيكاتسيالار قىزمەتىندە ءوتىپ جاتقان بريفينگىدە.
مينيستر بۇل ماسەلە قازاقستاندا زاڭناما دەڭگەيىندە رەتتەلەتىنىن ءتۇسىندىردى.
«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس بويىنشا ءبىزدىڭ ەلدە ايەلدەردىڭ رەپرودۋكتيۆتىك قۇقىعى بار. دەمەك، قۇرساعىنداعى بالانى دۇنيەگە اكەلۋ، اكەلمەۋ ماسەلەسىن ءوزى، وتباسىمەن اقىلداسىپ شەشەدى. سوندىقتان، ەلىمىزدە ابورتقا تىيىم سالاتىن نورمالار جوق. ازىرگە ونداي تىيىم سالاتىنداي نورمالار ەنگىزۋ قاراستىرىلىپ جاتقان جوق»، - دەدى ۆەدومستۆو باسشىسى.
سونداي-اق، اجار عينيات كوروناۆيرۋستىڭ قازىرگى شتامى باستاپقى شتامدارىنداي قاۋىپتى ەمەستىگى تۋرالى بولجامدارعا پىكىر ءبىلدىردى جانە انا مەن بالا ءولىمىن ازايتۋ ءۇشىن زاماناۋي تالاپتارعا ساي پەريناتالدىق ورتالىقتار سالىنىپ، ەلدەگى بۇكىل پەرزەنتحانالار كۇردەلى جوندەۋدەن وتەتىنىن ايتتى.
