كوروناۆيرۋستىڭ قازىرگى شتامى بۇرىنعىداي قاۋىپتى ەمەس پە - مينيستر جاۋاپ بەردى

نۇر-سۇلتان. قازاقپارات - دەنساۋلىق ساقتاۋ ءمينيسترى اجار عينيات ەل اراسنىدا كوروناۆيرۋستىڭ قازىرگى شتامى باستاپقى شتامدارىنداعىداي قاۋىپتى ەمەستىگى تۋرالى بولجامدارعا پىكىر ءبىلدىردى، دەپ حابارلايدى قازاقپارات ءتىلشىسى.

«ءيا، دارىگەرلەر، ونىڭ ىشىندە يممۋنولوگتار اتالعان ۆيرۋس تۋرالى، ونىڭ اعىمى تۋرالى كوپتەگەن اقپارات جيناپ جاتىر. بۇل ينفەكسيانىڭ سيكلدىك سيپاتىن، تولقىن-تولقىنمەن تارالاتىنىن بايقاپ وتىرمىز. بىلاي الىپ قاراساق، 2020 -جىلى دا، 2021 -جىلى دا ءدال وسى كەزدە اۋرۋدىڭ تارالۋى ارتقان بولاتىن. ۆيرۋستار دا قورشاعان ورتانىڭ، ۆاكسيناتسيا مەن اۋىرىپ شىعۋدان كەيىن حالىقتىڭ اعزاسىندا پايدا بولعان يممۋنيتەتتىڭ اسەرىنەن وزگەرىسكە ۇشىرايدى. ياعني، ۆيرۋس وسى فاكتورلارعا بايلانىستى ءارتۇرلى قالىپتا وتەدى، كلينيكاسى اركەلكى بولادى»، - دەدى مينيستر ورتالىق كوممۋنيكاتسيالار قىزمەتىندە ءوتىپ جاتقان بريفينگىدە.

ۆەدومستۆو باسشىسىنىڭ ايتۋىنشا، ۆيرۋستىڭ جاڭا شتامى بولاتىن-بولمايتىندىعى، ونىڭ كلينيكاسى قالاي قاتتالاتىنى ازىرگە بەلگىسىز.

«قازىر ءبىز، ءتىپتى بۇكىل الەم تاپ كەلىپ وتىرعان وميكروننىڭ ۆا.5 جانە ۆا.4 تيپتەرىنىڭ كلينيكالىق كارتيناسى مىناداي: ول تۇماۋ تۇرىندەگى ءجىتى رەسپيراتورلىق ۆيرۋستىق ينفەكسياعا ۇقساس، ايقىن قىزبا سيپاتتارى بار. ينفەكسيانىڭ ءدال قازىرگى تولقىنىندا دەلتا-ۆيرۋستاعىداي وكپەنى زاقىمداۋ بەلگىسى جوق. ناۋقاستار ايقىن ينتوكسيكاتسيامەن ءتۇسىپ جاتىر. سوندىقتان ينفەكسيا اعىمىنىڭ قۇبىلۋىنا بايلانىستى ەمدەۋ، شەكتەۋ شارالارىن بەلگىلەپ وتىرامىز»، - دەدى اجار عينيات.

ايتا كەتەيىك، سوڭعى دەرەكتەر بويىنشا، ەلىمىزدە 5,5 مىڭعا جۋىق ادام كوروناۆيرۋستان ەمدەلىپ جاتىر.