ل گ ب ت كونتەنت بالانىڭ ىشكى دۇنيەسى مەن جىنىستىق تاڭداۋىنا اسەر ەتە مە - پسيحولوگ پىكىرى
ءبىرى قارسى بولسا، ەكىنشىسى قانداي زاڭعا سۇيەنىپ تىيىم سالىنعانىن، تاڭداۋ ەركىندىگى قايدا قالعانىن سۇرايدى. وسى ورايدا، قازاقپارات ءتىلشىسى كەز كەلگەن كونتەنتتىڭ، ونىڭ ىشىندە ل گ ب ت كونتەنتى بالانىڭ دۇنيەتانىمى مەن جىنىستىق تاڭداۋىنا قالاي اسەر ەتەتىنى تۋرالى پسيحولوگتاردىڭ پىكىرىن تىڭداپ كورگەن ەدى.
«بالانىڭ دۇنيەتانىمىنا ول قارايتىن كونتەنتتىڭ ءبارى اسەر ەتەدى. وسىلايشا، ونىڭ ءوز الەمى قالىپتاسادى. بالا قارايتىن كونتەنت نەعۇرلىم ءارتۇرلى بولسا، ونىڭ الەمدى تانۋى دا سوعۇرلىم ناقتى بولادى. اتا- اناعا جۇكتەلەتىن جاۋاپكەرشىلىك - بالا قارايتىن، تىڭدايتىن كونتەنتتىڭ ءبىرىڭعاي نەمەسە شامادان تىس كوپ بولماۋىن رەتتەۋ. كونتەنتتىڭ بالاعا جىنىستىق جاعىنان اسەرىنە توقتالساق. جىنىستىق تاڭداۋ ادامعا تۋا بىتەدى. جاراتىلىسقا قارسى شىعا المايسىڭ. ءتىپتى، ل گ ب ت مازمۇندى كونتەنت تە بالانىڭ ىشكى دۇنيەسى مەن جىنىستىق تاڭداۋىن وزگەرتە المايدى»، - دەدى پسيحولوگ قالامقاس قاناپيەۆا.
ماماننىڭ ايتۋىنشا، بالا كەز كەلگەن دۇنيەگە قىزىعا قارايدى، كورگىسى كەلەدى، بىلگىسى كەلەدى. ال، وعان تىيىم سالۋدىڭ كەرى اسەرى بولۋى مۇمكىن.
«ەشقانداي مۋلتفيلم، ونىڭ ۇستىنە 5-6 سەكۋندتىق كادر بالانىڭ جىنىستىق تاڭداۋىن وزگەرتە المايدى. مۋلتفيلمدى پروكاتتان الىپ تاستاۋ - قورقىنىش، ۇرەيدىڭ بەلگىسى. تىيىم سالۋدىڭ كەرى اسەرى - بالالار مەن جاسوسپىرىمدەر ەركىندىك ىزدەپ كەتەدى. ناتيجەسىندە كىم بولادى، نە ىستەيدى، شەشىمدى وزدەرى قابىلدايدى»، - دەيدى ول.
اتى-ءجونىن كورسەتپەۋدى سۇراعان ەكىنشى پسيحولوگ مۋلتفيلمنىڭ شەتەلدىك ەكەنىن جانە ولاردىڭ ءوز مادەنيەتى مەن ۇستانىمى بارىن ايتتى.
«ادامدار حوت-دوگ، چيزبۋرگەر جەيدى. بۇل - شەتەلدىڭ تاماعى، ونى جەمەڭدەر دەپ تىيىم سالمايدى عوي. ونىڭ ۇستىنە، فاست-فۋدتىڭ زيانىن ءبارىمىز بىلەمىز. زيان ەكەنىن بىلە تۇرىپ، ونى بالالارعا بەرەمىز. كيىمگە قاتىستى دا سولاي. سوندىقتان، تىيىم سالامىز دەسەك، ىلىك تابىلادى. ارينە، ءبىرجىنىستىق قارىم-قاتىناستى ناسيحاتتاپ، تاراتۋعا قارسىمىز. ءبىراق، ول تۋرالى ءبىلۋىمىز دە كەرەك»، - دەيدى مامان.
پسيحولوگتىڭ پىكىرىنشە، مۋلتفيلم رەجيسسەرى اتالعان كادردى ل گ ب ت- نى جارنامالاۋ ءۇشىن ەمەس، ادامداردىڭ حابارى بولسىن دەگەن ماقساتتا جوسپارلى تۇردە ەنگىزگەن بولۋى دا مۇمكىن. «شىنىن ايتقاندا، ماسەلە كۇردەلى. سەبەبى، جىنىستىق، ونىڭ ىشىندە ءبىرجىنىستىق قاتىناس ماسەلەسىن بالاعا ايتقان دۇرىس پا، الدە مۇلدەم قوزعاماعان ءجون بە؟ ءبىر جاعىنان، بالانىڭ ءبىلىپ وسكەنى دۇرىس. قازىر ەستىمەسە، ەرتەڭ ەستيدى. باتىس ەلدەرىندە بۇل ماسەلە شەشىلگەن، اشىق ايتىلادى جانە زاڭمەن رەتتەلگەن»، - دەدى سپيكەر.
ءوز كەزەگىمىزدە قازاقستاندا «بازز لايتەر» انيماتسيالىق فيلمىن پروكاتقا شىعارۋعا تىيىم سالۋعا قاتىستى مادەنيەت جانە سپورت مينيسترلىگىنەن رەسمي تۇسىنىكتەمە بەرۋىن سۇرادىق. اتالعان ۆەدومستۆونىڭ باسپا ءسوز قىزمەتى جاۋاپ بەرۋگە ۋادە ەتتى.
ەسكە سالساق، كەشە مادەنيەت جانە سپورت ءمينيسترى داۋرەن ابايەۆ قىزۋ تالقىعا تۇسكەن «بازز لايتەر» انيماتسيالىق فيلمى قازاقستان كينوتەاترلارىندا كورسەتىلمەيتىنىن مالىمدەگەن ەدى.
