ساراپشى شەنەۋنىكتەردىڭ جەمساۋىتىنا اينالعان ساقتاندىرۋ جۇيەسىن ايتتى
مۇنداي پىكىردى ەكونوميست ارمان بەيسەمبايەۆ ءبىلدىردى، دەپ حابارلايدى قازاقپارات ءتىلشىسى.
«بىزدە قانداي دا جاقسى ءىس قولعا الىنسا، وندا ول مىندەتتى تۇردە شەنەۋنىكتەردىڭ جەمساۋىتىنا اينالادى. وكىنىشكە وراي، مىندەتتى الەۋمەتتىك مەديتسينالىق ساقتاندىرۋ جۇيەسى (مءا م س) دە سونىڭ كەبىن كيىپ وتىر. كوروناۆيرۋس تولقىنى ءجۇرىپ وتكەن 2020 -جىلى دا، وتكەن جىلى دا «جالاقىدان اۋدارىم جاسايمىز، ءبىراق ءوز قاراجاتىمىزعا نەگە ەمدەلەمىز» دەگەن سۇراق اشىق قويىلدى. سويتسەك، كوپشىلىك بۇل ساقتاندىرۋعا كىرمەيدى دە ەكەن. وندا ونىڭ بىزگە قاجەتى قانشا؟ بۇل سىن م ءا م س جۇيەسى قۇرىلعان العاشقى كۇننەن بەرى ايتىلىپ كەلەدى»، - دەدى ساراپشى.
ونىڭ پايىمىنشا، مەديتسينالىق ساقتاندىرۋ قورىن تاراتىپ، بارلىق وكىلەتىن جەكەمەنشىك ساقتاندىرۋ كومپانيالارىنا ءبولىپ بەرۋ قاجەت. ال مەملەكەت ولاردىڭ جينالعان قاراجاتتى اشىق جۇمساۋىنا جانە ەسەپ بەرىپ وتىرۋىنا باقىلاۋ جۇرگىزۋى ءتيىس. وسى رەتتە ساراپشى باستاپقى كەزەڭدە قور قۇرماي- اق دايىن قۇرىلىمدى پايدالانىپ، ساقتاندىرۋ نارىعىن دامىتۋ دۇرىس بولار ەدى دەگەن پىكىردە.
«بىلدەي ءبىر قور قۇرۋ قانشالىقتى قاجەت بولدى؟ مۇنىڭ ۇستىنە مەديتسينا قىزمەتكەرلەرىنىڭ ءوزى الاياقتىققا بارا باستادى. ەر ادامعا جاتىرى تومەن ءتۇسىپ كەتكەن دەگەن دياگنوز دا قويعان جاعداي بار. ال جەكەمەنشىك كومپانيالاردا مۇنداي الاياقتىق اۋقىمى ۇلكەن بولا قويماس ەدى. جۇيە اشىق بولۋى ءۇشىن تولەم جاساۋشىلارعا جەكە كابينەت اشىپ، جاريا ەسەپ جۇرگىزۋگە، سول ارقىلى اقشاسىنىڭ قالاي جۇمسالعانىنا، كورسەتىلگەن قىزمەتتەردى قاداعالاۋعا مۇمكىندىك بەرۋگە بولادى. جۇمىس بەرۋشىلەر ساقتاندىرۋ كومپانيالارىمەن كەلىسىمشارت جاساي الادى. وسىدان كەيىن جۇمىسشى مەديتسينالىق قىزمەت العان سوڭ انىقتاما تاپسىرىپ، ال ساقتاندىرۋ كومپانياسى شىعىندارىن جابار ەدى»، - دەدى ارمان بەيسەمبايەۆ.
ايتا كەتەيىك، كەشە ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ەلىمىزدىڭ دەنساۋلىق ساقتاۋ سالاسىندا تۇيتكىلدى ماسەلەلەر كوپ ەكەنىنە نازار اۋدارعان بولاتىن.
سونىمەن قاتار پرەزيدەنت ۇكىمەتكە ستراتەگيالىق جوسپارلاۋ جانە رەفورمالار اگەنتتىگىمەن بىرلەسىپ، مەديتسينالىق ساقتاندىرۋ جۇيەسىن جەتىلدىرۋ جونىندە ۇسىنىستار دايىنداۋدى تاپسىرعان ەدى.
