جەتىنشى قاباتتان قۇلاعالى تۇرعان بالانى قۇتقارعان جاسوسپىرىمگە مينيستر توسبەلگى تاقتى - فوتو

نۇر-سۇلتان. قازاقپارات - تەرەزەدەن قۇلاعالى تۇرعان بالانى قۇتقارعان ەلوردالىق ەسداۋلەت داۋىتبەكوۆ «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى، دەپ حابارلايدى قازاقپارات توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ.

«بۇگىن توتەنشە جاعدايلار مينيسترلىگىندە مينيستر يۋري يلين ەرلىگىمەن كوزگە تۇسكەن داۋىتبەكوۆ ەسداۋلەت ەسبولات ۇلىن «توتەنشە جاعدايداعى ەرلىگى ءۇشىن» توسبەلگىسىمەن جانە ەستەلىك سىيلىقپەن ماراپاتتادى. كەزدەسۋگە باتىردىڭ اناسى اسەمگۇل قابدىقالىقوۆا دا قاتىستى»، - دەلىنگەن رەسمي حابارلامادا.

يۋري يلين بۇگىنگىنىڭ باتىرىنا العىس ءبىلدىرىپ، بولاشاقتا ت ج م ازاماتتىق قورعاۋ ورگاندارىنىڭ قاتارىنان وسىنداي ەر جىگىتتەردى كورگىسى كەلەتىنىن ايتتى. سونىمەن قاتار، اناسىنا ناعىز باتىردى تاربيەلەگەنى ءۇشىن العىس ءبىلدىردى.

ەسكە سالساق، وقيعا 13-شىلدەدە نۇر-سۇلتانداعى «شەرقالا» تۇرعىن ءۇي كەشەنىندە بولعان. 17 جاستاعى بوزبالا قۇتقارۋ بولىمشەلەرى كەلگەنگە دەيىن كورشى ءۇيدىڭ تەرەزەسىنەن ءوتىپ، 7-قاباتتان قۇلاعالى تۇرعان بالانى قۇتقارعان ەدى.

وقۋ-اعارتۋ ءمينيسترى اسحات ايماعامبەتوۆ ەلوردالىق مەكتەپ تۇلەگى ەسداۋلەت داۋىتبەكوۆكە ءبىلىم گرانتىن تابىستادى. سونداي-اق، ەلوردالىق مەتسەنات 3 بولمەلى پاتەر سىيلادى.

وسى ورايدا، توتەنشە جاعدايلار مينيسترلىگى تۇرعىندارعا ەسكەرتەدى: «قۇرمەتتى اتا-انالار، بۇل - بالا امان-ەسەن قۇتقارىلعان از عانا مىسالداردىڭ ءبىرى. ءبىراق، وكىنشكە قاراي، قايعىلى اياقتالاتىن وقيعالار كوپ كەزدەسەدى. بالالاردى ەرەسەكتەردىڭ قاراۋىنسىز قالدىرماڭىز! ەگەر ۇيدە كىشكەنتاي بالا بولسا، تەرەزەلەردى اشىق قالدىرماڭىز، ويتكەنى بالانىڭ قۇلاۋىنا ساناۋلى عانا سەكۋندتار جەتكىلىكتى. بۇل بالا ولىمىنە اكەپ سوعۋى ابدەن مۇمكىن».