قازاقستاندىقتارعا كومىردى ەرتەرەك ساتىپ الۋدى ۇسىندى

نۇر-سۇلتان. قازاقپارات - يندۋستريا جانە ينفراقۇرىلىمدىق دامۋ مينيسترلىگىندە الداعى جىلۋ بەرۋ ماۋسىمىنا دايىندىق ماسەلەلەرى تالقىلاندى.

بۇل تۋرالى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ حابارلايدى.

مينيستر قايىربەك وسكەنبايەۆتىڭ توراعالىعىمەن وتكەن كەڭەسكە يندۋستريا جانە ينفراقۇرىلىمدىق دامۋ ۆيتسە- ءمينيسترى ەركەبۇلان داۋىلبايەۆ، يندۋستريالىق دامۋ كوميتەتىنىڭ ءتوراعاسى ءىلياس وسپانوۆ، «ق ت ج» ۇ ك» ا ق باسقارۋشى ديرەكتورى باۋىرجان ورىنباساروۆ، سونداي-اق جەرگىلىكتى اتقارۋشى ورگاندار مەن سەرىكتەستىكتەردىڭ وكىلدەرى قاتىستى.

مينيسترلىك 2022-2023 -جىلدارعا ارنالعان بيۋدجەتتىك ۇيىمدار مەن تۇرعىنداردىڭ كومىرگە دەگەن سۇرانىسىنىڭ جوسپارىن ازىرلەدى. جوسپار بويىنشا تۇتىنۋ كولەمى شامامەن 9,5 ميلليون توننانى قۇرايدى، ونىڭ ىشىندە ىشكى سەكتور - 2,8 ميلليون توننا.

«مينيسترلىك كەلەسى جىلىتۋ ماۋسىمىنا دايىندىقتى ناۋرىز ايىندا باستادى. جەرگىلىكتى اتقارۋشى ورگانداردىڭ وكىلدەرىنە 15-شىلدەدەن باستاپ حالىق ءۇشىن كومىر جيناۋدى باستاۋ ۇسىنىلادى. مينيسترلىك جول كارتاسىن ازىرلەدى. بۇگىنگى تاڭدا كارتا وبلىستاردىڭ، نۇر-سۇلتان، الماتى جانە شىمكەنت قالالارىنىڭ اكىمدىكتەرىنە جىبەرىلدى»، - دەدى ءىلياس وسپانوۆ.

جيىندى قورىتىندىلاعان قايىربەك وسكەنبايەۆ جاۋاپتى تۇلعالارعا جىلۋ بەرۋ ماۋسىمىنا دايىندىق جۇمىستارىن تۇراقتى باقىلاۋدا ۇستاۋدى تاپسىردى.