قىتاي تۇرمەسىندە وتىرعان اقجارقىنعا ارنالعان بەينەبايان شىقتى

نۇر-سۇلتان. قازاقپارات – ال بۇل ءاندى العاش ساحناعا مارقۇم اجار تۇزەلبەك قىزى الىپ شىققان ەدى.

ءانشى ارايلىم ماحانبەتجانوۆا قىتاي تۇرمەسىندە وتىرعان اقجارقىن تۇرلىبايعا ارناپ «اناعا حات» انىنە بەينەبايان ءتۇسىردى، دەپ حابارلايدى Zakon.kz.

بەينەبايانعا كورەرمەن بىلاي دەپ پىكىر جازىپتى:

«امان- ەسەن ەلگە ورالۋىن تىلەيمىن! جۇرەككە جەتكىزىپ ورىنداپسىڭ»، «جات ەلدە جاتقان قارشاداي قىزدىڭ اناعا، ەلگە دەگەن ساعىنىشى وسى ءاننىڭ تاريحى ىسپەتتى»، «جۇرەگىم اۋىردى مىنانى كورىپ. انالار امان بولسىنشى. انادان بالانى، بالادان انانى ايىرماسىن!»، «ارايلىم، جارايسىڭ! ونەرىڭ ورگە ءجۇزسىن! ادەمى شىعىپتى، اسەرلى».

ەسكە سالساق، اقجارقىن تۇرلىباي 2014 -جىلى گۋانجوۋ اۋەجايىندا ۇستالدى. ول ەسىرتكى كونترابانداسى ءۇشىن ايىپتالىپ، ءومىر بويىنا باس بوستاندىعىنان ايىرىلدى.

2015 -جىلى قازاقستان رەسپۋبليكاسىنىڭ ىشكى ىستەر مينيسترلىگى نيگەريا ازاماتىنا قاتىستى قىلمىستىق ءىس قوزعادى.

20-ماۋسىمدا اقجارقىن تۇرلىبايدىڭ ادۆوكاتى سۇڭقار نۇرماعامبەتوۆ كۇدىكتى نيگەريا ازاماتى شەتەلدە ۇستالعانىن حابارلادى. بۇعان دەيىن وعان حالىقارالىق ىزدەۋ جاريالانعان بولاتىن.

ال بۇل ءاندى العاش ساحناعا مارقۇم اجار تۇزەلبەك قىزى الىپ شىققان ەدى. ءانى مەن ءسوزىن ءجاۋدىر ارتىقبايەۆا جازعان. سازگەر بۇل ءاندى تۋعان ولكەسىن، بالالىق شاعىن، توركىنىن، الىستا قالعان اناسىن ەسكە الىپ جازعان ەكەن. اجار تۇزەلبەك قىزىنىڭ بەينەبايانىندا دا ەسىرتكىمەن ۇستالعان قىزدىڭ وقيعاسى كورسەتىلەدى.